Smart Gilas pakyas

CEBU, Philippines - Hingpit na nga nahanaw daw aso ang damgo sa Smart Gilas Pilipinas nga moduwa sa 2012 London Olympics human sila gilubong sa Jordan, 61-75, sa semifinals sa 26th FIBA Asia Championships kagahapon didto sa Wuhan, China.

Moduwa na lang para third ang Gilas ug ilang sangkaon ang mapilde sa laing semis match tali sa China ug South Korea.

Walay angay'ng ikauwaw ang Gilas tungod kay kini ang labing unang higayon sukad niadtong 1987 nga nakalahutay sa final four ang Pilipinas.

Maayo unta ang duwa sa Pilipinas sa pagsugod diin milabaw pa kini og tres puntos, 22-19 sa first period. Tungod sa kanihit sa labaw, dali nga nailog sa Jordan ang labaw, 31-30 sa nahabiling 1:02 sa second quarter.

Nahimong low-scoring ang duwa tali sa duha ka koponan diin nagpuli-puli sila pagkupot sa labaw, apan mi-rally ang Jordan sud sa sayes minutos sa third period aron moposte sa ilang labing dakung labaw, 49-41.

Wala kapugngi sa Gilas ang naturalized player sa Jordan nga si Rasheem Wright diin mitala kini og 10 puntos sa maong kuwarter.

Mibawos sab og rally ang Gilas sa pagpangulo nilang Marcus Douthit ug JV Casio aron panipsan ang labaw sa Jordan ngadto na lang sa tres puntos 48-51 sa final period.

Nahimong kulbahinam ang duwa dihang misikit ang Smart Gilas, 54-55 human sa follow-up dunk ni Kelly Williams nga aduna pay 4:32 nga nahabiling oras sa duwa, apan didto ra kutob ang ilang mga paningkamot kay sa nagkagamay ang oras, nagkabangis sab ang Jordan sa pagpangulo sa ilang star player nga si Osama Daghles, kinsa mitusak og duha ka sunod-sunod nga three-pointers.

Ang slamdunk ni Ahmed Abbas sa nahabiling 1:40 maoy naghatag og kasiguroan sa kadaugan sa Jordan nga miposte og 72-57 nga bentaha.

Si Wright maoy topscorer sa Jordan nga mipabuto og 24 puntos, samtang ang gipalagpot nga Gilas gipangulohan sab ni Douthit pinaagi sa iyang 19 puntos uban ang 14 ka rebounds.  (BANATSPORTS)