CEBU, Philippines - Pormal na nga gideklara ni Philippine Volleyball Federation (PVF) president Gener M. Dungo ang Cebu isip "Volleyball Capital of the Philippines" sunod bulan ug maoy mo-host sa World Volleyball Grand Prix sa Agosto sunod tuig.
Si Dungo mitambong sa pormal nga pagbukas sa 7th Governor Gwen Garcia Unity Volleyball (GUV) Cup diha sa Cebu International Convention Center sa Mandaue City.
Sumala pa ni Dungo, nga karong Oktubre 9, ang PVF mohimo sa ilang quarterly board meeting sa Manila diin mo-propose siya og usa ka resolusyon ngadto sa board of administration kalabot sa duha ka importanteng mga butang sa volleyball community dinhi sa nasud.
"This board meeting is very important for us because we will act on the proposed resolutions to our board of administration, for the declaration of the province of Cebu as the “Volleyball Capital of the Philippines” and host for the next World Volleyball Grand Prix in August, 2012 subject to the approval of the FIVB," matud ni Dungo.
"These will surely boost the volleyball development and tourism in our country. I am very positive that my fellow board members will ratify the resolutions," dugang pa niya.
Sa iyang bahin, si Gov. Garcia gibati og daku'g kalipay sa maong dungog ug ang impact nga ang pito na ka tuig nga torneyo nakalahutay pa ning panahona.
Namugna kini niadtong 2005 isip GUV Cup for Women diin ang katuyoan niini mao ang paghiusa sa tanang local government units sa probinsiya pinaagi sa paugnat sa kusog. Nagtubo kini matag tuig uban ang saad nga ilakip ang men's division ug karon elementary division.
Gipasidunggan sab atol sa opening ceremonies ang Garbo sa GUV Cup nga gilangkuban sa mga atleta, kinsa karon niduwa sa nagkalain-laing unibersidad dinhi sa Sugbu.
Sila mao si Christy Sucalit (USC), Marjorie Coloscos (CDU) ug Jeff Jose Duran Jr. (USC) sa Catmon, Neslie Aloyan (USPF), Shergiyebeach Reboquio (UC), James Henry Pasquite (UV) ug Evan Sevilleno (UC) gikan sa Bantayan, Neresa Villanueva (SWU), Hansel Bantiles (SWU) ug Katherine Jumapao (USC) gikan sa Liloan, Jerra Mae Pacinio (SWU) ug Ian Christopher Pacinio (UV) gikan sa Sta. Fe, Noeme Ann Alocillo (SWU-HS) ug Wilhemina Papa (USC) gikan sa Alegria, Wardel Redoble (USJR) ug Kingfred Sambrana (ANS) gikan sa Moalboal, Excel Ignacio (USC) gikan sa Consolacion, Merlissa Luage (UC) gikan sa Ginatilan, Gavinito Yongco III (USC) gikan sa Tabogon, Kin Lauglaug (USJ-R) gikan sa Carcar ug Winston Bagolor (USPF) gikan sa Toledo.
Ang GUV Cup athletes kinsa niduwa karon uban sa Hope Christian School sa Manila ang gipasidunggan usab. Sila mao ang mga kanhi sakop sa Catmon elementary team nga sila Mae Angeli Basarte, Maria Lina Isabel Molde ug Justin Dorog. Ang Catmon nakadawat sab og special awards isip best in uniform ug ang Madridejos alang sa Early Bird. (BANATSPORTS)