CHARM sud finals

CEBU, Philippines - Naangkon sa City Hall Association of Reporters in Media (CHARM) ang katapusang luna sa finals dihang ilang gilubong ang Courts, 82-68 sa 2011 Press Freedom Cup basketball tournament sa miaging gabii diha sa Cebu City Sports Institute sa Sawang-Calero.

Gumikan sa maong kadaugan, ang CHARM maoy nakakuha og katungod sa pakigsangka sa defending champion Defense-PNP Press Corps (DEPP) sa finals karong alas-10 sa buntag didto gihapon sa Sawang-Calero.

Samtang ang napilde nga Courts moduwa na lang alang sa ikatulong dapit batok sa Sportswriters Association of Cebu (SAC)-Veranda, kinsa miyukbo ngadto sa DEPP sa iskor nga 73-80.

Ang Courts ug SAC magsangka sa pasiunang duwa sa alas-8:30 sa buntag.

Ang basketball tournament kabahin sa kasaulogan sa 17th Cebu Press Freedom Week.  (BANATSPORTS)