CEBU, Philippines - Ang gikahinaman nga seventh edition sa Governor Gwen Garcia Unity Volleyball (GUV) Cup, ang labing daku ug bonggang volleyball tournament sa nasud, moulbo na karong alas-8:30 sa buntag diha sa Cebu International Convention Center (CICC) sa Mandaue City.
Adunay 94 ka teams gikan sa 47 local government units (LGU) nga sakop sa probinsiya sa Sugbu ang mosalmot sa kompetisyon nga gilaumang molungtad ngadto sa tulo ka bulan.
Ang women's division maoy labing daghan og entrante nga adunay 47 ka teams, gisundan sa men's bracket nga may 27 ka teams. Ang bag-ong napuno nga elementary category adunay 20 ka koponan.
Sa labing unang higayon sa pito ka tuig sa kasaysayan sa GUV Cup, ang lagda nga "no benching of players" ang ipatuman sa tanang tulo ka kategoriya.
Sa lagda, ang first stringers moduwa sa first set, ang second six mosulod sa second set, samtang ang third set, mag-agad na kini sa coaches. Mao sab sa semifinals ug championship.
"We made this change in order to hone the talents of these players and that everybody will be able to play during their respective games. They better choose the best players in their municipalities," matud pa ni CEVA executive director Jerry Winona Catipay.
Human sa opening ceremonies, ang aksiyon sa Cluster 1 isunod dayon. Sa elementary division, ang Carcar moharong sa Argao, samtang sa women's division, ang Talisay City makigtigi sa Minglanilla.
Sa katapusang duwa ning adlawa, ang reigning men's champion Talisay makigbangga sa Carcar.
Si Cebu Governor Gwendolyn 'Gwen' Garcia motambong sa opening ceremonies uban ni Philippine Volleyball Federation (PVF) president Gener Dungo. Ubanan sab sila ni Cebu Schools Athletic Foundation Inc. (CESAFI) commissioner Felix Tiukinhoy Jr., CEVA officials, congressmen ug mga mayor sa nagkalain-laing mga siyudad ug munisipalidad. (BANATSPORTS)