CEBU, Philippines - Ang M. Lhuillier Kwarta Padala-Cebu Niños moduwa na sab sa usa ka pamilyar nga kontra dihang ilang harungon ang Alaska Aces sa opener sa Cebu City Mayor’s Cup Basketball Invitational game karong gabii diha sa Cebu Coliseum.
Agi'g pagsugod sa tulo ka adlaw'ng torneyo nga gipasiugdahan sa Cebu City Government, ang Niños ang hari sa commercial basketball lukop nasud makigsangka sa Alaska sa alas-5 sa hapon sa dili pa ang lahugay tali sa Meralco Bolts ug Powerade Tigers sa alas-7:30 sa gabii.
Moduwa sa unang higayon nga wala ang ilang long-time coach Tim Cone, kinsa atua na karon sa B-Meg Derby Ace Llamados, ang Alaska ni coach Joel Banal mosuway sa pagdepensa sa ilang korona nga makapasamot sa ilang kompiyansa sa ilang kampanya sa PBA All-Filipino Cup nga buksan karong Oktubre 2.
Mangulo sa Alaska ang idlas nga point guard nga si LA Tenorio uban nilang Bonifacio Custodio, Tony Dela Cruz, Joachim Thoss, Samigue Eman, Cyrus Baguio ug Brandon Cablay.
Mokompleto sa line-up sa Alaska mao sila si Wesley Gonzales, Ervin Sotto, Paolo Bugia, Mark Borboran ug rookies Eric Salamat ug kanhi Cebu Niños cager Ariel Mepaña.
Ang sixth overall pick sa Alaska nga si Mac Maracel dili makaduwa sa team kay miuban pa siya sa kampanya sa Smart Gilas Pilipinas sa nagpadayong FIBA Asia Championship didto sa Wuhan, China.
Sa laing bahin, ang Niños ni team owner Michel J. Lhuillier ug legendary coach Raul 'Yayoy' Alcoseba, mopamatuod na sab nga angayan silang bansagan og "Giant Killer of the South" diin laraw kini nga mohimo og upset batok sa bisitang PBA team.
Sa gihapon, si Alcoseba magsalig nila ni Bruce Dacia, Stephen Padilla, Abby Santos, Richard Ian Saladaga,Franklin Nailon, Felix Belano uban sa mga bench players nga sila si Nat Cruz, Jayford Rodriguez, Ferdinand Lusdoc ug new-comer Ramsey Williams.
Ang torneyo mosubay og single round robin format. Ang team nga adunay daghan og daog human sa tulo ka adlaw nga kompetisyon, maoy ilhong kampiyon. (BANATSPORTS)