Francisco handang-handa na para harapin si Domingo
MANILA, Philippines - Ibang Drian Francisco ang makikita sa ring sa tagisan nila ng beteranong si Michael Domingo sa Sabado sa Makati Coliseum.
Sa pulong pambalitaan na ginanap kahapon sa Tiara Hotel sa Makati City para sa bakbakang handog ng Saved By The Bell at Ala Promotions na tinaguriang Pinoy Warriors, sinabi ni Francisco ang kahandaan na bumangon matapos maagaw sa kanya ang interim WBA super flyweight title nang matalo kay Tepparith Singwancha ng Thailand noong Mayo 1.
“Hindi na mauulit ang pangyayaring iyon. Ginawa ko ang lahat ng paghahanda para sa labang ito at talagang handang-handa ako rito,”wika ni Francisco na may 20 (16KO), isang talo at isang tabla karta sa 22 laban.
Ang sagupaan ay gagawin sa mas mataas na bantamweight division at si Francisco ang aakyat ng timbang para harapin si Domingo na tiwala rin sa tsansa na manalo.
“May babagsak,” wika ni Domingo na bihasa nang lumaban sa bantamweight at mayroong 42 panalo at 23KO sa 60 laban.
Para mabigyang kasiyahan ang mga mahihilig sa boxing, binuksan na sa publiko ang gate at ang mga papapasukin ay sa pamamagitan ng first-come-first-serve basis.
“Solar Sports and SBB decided to open the gates for free on a first come, first served basis. Ginawa namin ang labang ito sa pagitan nina Francisco at Domingo para tulungan sila sa hangaring makalaban sa lehitimong titulo,” wika ni SBB president Elmer Anuran.
- Latest
- Trending
