Lopez, Tutor nidominar sa "Dagan sa Kabataan"
CEBU, Philippines - Mga veteran runners ang mipatigbabaw sa 15K premier division sa labing unang "Dagan sa Kabataan" niadtong Domingo didto sa The Terraces sa Ayala Center-Cebu.
Ang Ultramarathoner nga si Mendel Lopez maoy naghari sa 15K men’s class, samtang si Christy Sevilleno-Tutor sa women’s division.
Si Lopez mitapos sa lumba sud sa 52 minutos ug 46.29 segundos batok sa running coach nga si Sherwin Manaquil, kinsa mipahiluna sa ikaduhang dapit sa oras nga 52:56.12. Ang defending Milo regional champion nga si Adonis Singson mipahiluna sa ikatulo sa oras nga 53:29.24.
Sa iyang bahin, si Tutor, mihuman sa lumba sud sa usa ka oras, siyete minutos ug 19 segundos. Gisundan sa laing beteranang marathoner nga si Madelyn Carter (1:08.08) ug Mary Jane Beboso (1:10.22) alang sa ikaduha ug ikatulo nga dapit.
Sa 5K division, si Mary Joy Tabal, kinsa nakahukom nga modagan sa mas mubo nga distansiya maoy midaog sa oras nga 19:14.89. Iyang mga runners up mao sila si Jhiane Andrin (20:46.56) ug Keisha Mae Delicios (21:10.82). Mikompleto sa top three finishers sa 5K men’s class mao sila si Philip Duenas (10:05.25), Robert Daang (10:07.64) ug Joebert Carolino (10:23.09). (BANATSPORTS)
- Latest
- Trending
