Tri-J/Hankook mipukan sa Los Roadstar
CEBU, Philippines - Miarangkada na sab ang Tri-J/Hankook team aron pahamtangan og laing kapildihan ang Los Roadstar, 93-84 ug aron usab magpadayon nga mag-una sa overall standing sa Castrol ICBA Basketball League didto sa San Carlos Seminary gym sa Mabolo, ning siyudad.
Sa gihapon, ang trayanggulo nilang Nestor Ombing, Arnold Corbita ug Mario Medel nga pulos mi-iskor og double figures mao na sab ang responsable sa kadaugan sa Tri-J/Hankook nga ning higayona, mao na ang gituohang molangkat sa kampiyonato.
Si Ombing mipabuto og 22 puntos, gisundan ni Corbita nga mirakrak og 21 puntos, samtang si Medel mitira og 15 puntos.
Ang nasugamak nga Los Roadstar gipangulohan ni Sherwin Candilada sa iyang sipa kaayong 38 puntos. Sila si Ariel Gella ug Charlito Alivo nagkumboya og 23 puntos.
Sa laing aksiyon, ang Tri-J/GS sa pagpangulo ni Erwin Medel, yano kaayong miposte og daog pinaagi sa paglubong sa Rey-Ken sa iskor nga 84-44.
Si Medel mi-iskor og 24 puntos, samtang laing tulo niya ka teammates ang mirehistro sab og double figures. Si Marvin Bihag miani og 17 puntos, si Alden Emactao mipupo og 12 puntos ug si Jovamie Alipio mihagpat og 10 puntos.
Sila lang si Gregorio Laya ug Kenneth Joel Yurag ang nakakuha og double digits alang sa pilderong Rey-Ken. (BANATSPORTS)
- Latest
- Trending
