MANILA, Philippines - Kasabay ng paglimita kay American import Lauren Ford sa 5 points, dinomina ng Philippine Army ang San Sebastian College, 25-9, 25-20, 25-16, sa Game One ng Shakey‘s V-League Open Conference finals kahapon sa The Arena sa San Juan.
Nagrehistro si Rachel Ann Daquis ng 14 hits para sa Lady Troopers, habang may 13 points si Mary Jean Balse at 11 kills si Michelle Carolino para sa kanyang 12 points sa 1-0 abante nila sa kanilang best-of-three titular showdown ng Lady Stags .
Nag-ambag naman sina Marietta Carolino at Cristina Salak ng tig-9 hits.
Tuluyan nang makukuha ng Army ang korona sakaling manaig sila sa San Sebastian, ang 2008 second conference champion, Game Two sa Huwebes.
Sa kabuuan ng laro, nagposte ang Lady Troopers ng 36 kills, 10 blocks at 10 points mula sa service line kontra sa Lady Stags.
Nalimitahan ng Army si Ford, hinirang bilang Most Valuable Player at Best Scorer, sa 5 points sa panig ng San Sebastian.
Sa agawan naman para sa third place trophy, giniba ng Ateneo De Manila University ang Philippine Navy, 25-22, 23-25, 25-19, 14-25, 15-8.
Humataw si Fille Cainglet ng 30 points para sa 1-0 bentahe ng Lady Eagles sa kanilang serye ng Lady Sailors.
Kumuha si Cainglet ng 28 kills para sa Ateneo, ang first conference titlist, na ang huli ay lumusot sa depensa ng Navy.