Gimik sa weigh-in

Kumbati na! Si Floyd Mayweather Jr. makigbinayloay na og dagway sa Mehikanong si WBC welterweight champion Victor Ortiz karong adlawa didto sa MGM Grand Garden Arena.

Sama sa naandan, sa matag away ni Mayweather dili gyud mahitabong walay gimik nga iyang buhaton aron makahalin. Kun maka-KO pa ang tinutokan ni Mayweather mitikangkang na si Ortiz. Misamot pa og kainit dihang gition ni Mayweather ang iyang kumo sa liog ni Ortiz.

Gawas sa duha, init usab kaayo ang mga supporters sa duha ka kampo nga daw kahamagon sab. Sa video ug sa pictures, nindot kini kaayong tan-awon kay kulbahinam man.

Ang labing mabulahan sa init nga tradisyonal nga ‘staredown’ sa matag weigh-in mao ang promoters ug ang boxers tungod kay kini mokita man og daku kay lagi init kaayo.

Ang init kaayong ‘staredown’ maoy wala na kaayo makita sa nangaging mga away sa atong pambato nga si Manny Pacquiao. Kay ang atong idolo magngisi ra man. Ambot kaha kun sa ila unyang weigh-in ni Juan Manuel Marquez magngisi pa gihapon siya.

Hinuon si Pacquiao mipadayag naman nga “no more Mr. Nice Guy” diha sa away nila karon ni Marquez.

Sa ako lang, wala kinahanglana pa ni Pacquiao nga mag-agresibo diha pa lang sa weigh-in kay halinon naman gyud siya karong mga panahona. Gawas pa, di lisud i-market si Marquez ilabi na nga trilogy na nila kini karon.

* * *

Pwerteng bisiha sa mga sakop sa media karong semanaha nunot sa ika-17 ka tuig nga pagsaulog sa kagawasan sa prensa dinhi sa Sugbu.

Ang Cebu Press Freedom Week usa ka pamaagi sa paghandom sa Cebu media sa September 21, 1972 Martial Law Declaration ni kanhi rehimeng Ferdinand Marcos.

Lakip sa mga kalihukan gawas sa mga kalingawan mao ang nagkadaiyang forums nga daghang impormasyon makat-onan dili lang sa mga working media men kun dili lakip sa mga estudyante gikan sa mga batid nga mga imbitadong speakers.

* * *

SALAMAT. Nagpasalamat ang Alpha Sigma Omega-Sigma Chi Gamma International Collegiate Fraternity and Sorority CYMA staff ilabi na ni Frederick Tecson sa gihatag nga used clothings nga gidonar sa grupo sa mga nasunogan.

* * *

PAGTULON-AN: Sagad sa hinungdan nga kita mapakyas kini tungod kay atong pugson og buhat ang butang nga dili atong linya.

* * *

[email protected]