CIT-U mibugto daog sa SHS-AdC

CEBU, Philippines - Napakgang sa Cebu Institute of Technology-University (CIT-U) Wildkittens ang siyam ka sunod-sunod nga daog sa Sacred Heart School-Ateneo de Cebu (SHS-AdC) Magis Eagles pinaagi sa pag-iskor og impresibong 61-62 nga kadaugan sa secondary match sa 11th Cebu Schools Athletic Foundation Inc. (CESAFI) basketball season kagahapon diha sa Cebu Coliseum.

Mga duwa KARON

(Cebu Coliseum)

JUNIORS

1:00 pm - UV vs. USC

2:30 pm - UC vs. DBTC

4:00 pm - USPF vs. USJ-R

SENIORS

5:30 pm - USPF vs. CIT-U

Sa laing duwa, ang Cebu Eastern College (CEC) Dragons nga gipaluyohan ni Chester Cokaliong, walay kukaluoy nga milubong sa University of San Carlos (USC) Baby Wariors sa iskor nga 92-76.

Ang Wildkittens, kinsa miinat sa ilang win-loss record ngadto sa 3-7 mihimo og zone defense aron dili makabuylo ang mga tirador sa Magis Eagles ug mipatuman sab og double-teaming defense ngadto sa mga big men nga sila si Julius Cadavis ug Dawn Henric Ochea. Si Ochea nalimitahan lang ngadto sa otso puntos, samtang ang sentrong si Cadavis, kinsa napugos pagduwa bisan og wala sa maayong kondisyon, mi-iskor lang og sayes puntos.

Apan bisan sa ilang kapildihan, ang Magis Eagles padayon gihapon nga nagsolo sa liderato sa secondary division.

Si Gerald Delima mihipos og 24 puntos, samtang si Mark Kong mitikdol og 20 puntos aron pangulohan ang Wildkittens ni coach Andot Fuentes.

Sa laing bahin, si James Neil Sumayang, kinsa na-fouled out sa katapusang 10.4 segundos sa duwa, maoy nangu sa Dragons sa iyang 21 puntos, gisundan nilang Luther Huevos ug Alfred Anecito Sedillo nga mihungit og 17 puntos matag usa. (BANATSPORTS)