Talisay makabaton karon og koponan alang sa CVIRAA

CEBU, Philippines - Mailhan na kun kinsa ang morepresentar sa Talisay City alang sa nagsingabot nga CVIRAA Meet sa dihang ang championship round sa Talisay City Inter-secondary Basketball and Volleyball tournament himuon karong adlawa didto sa Talisay City Sports Complex.

Ang torneyo   kabahin sa Talisay City Sports Development Program 2011 nga gipasiugdahan sa Talisay City Sports Commission ug Talisay City Government uban sa suporta sa Department of Education (DepEd).

Gisalmotan kini sa 23 ka mga koponan gikan sa nagkadaiyang public ug private high schools sa Talisay.

Upat ka koponan ang magsangka karon sa kampiyonato sa boys ug girls volleyball event, samtang laing duha ang mag-ilog sa titulo sa basketball boy’s category.

Ang Sisters of Mary School makigsangka sa Jaclupan National High School sa girls volleyball finals, samtang ang St. Scholastica’s Academy ug Lawaan National High School magtigi sa championship sa boys division.

Mag-ilog usab sa korona sa boy’s basketball division ang St. Scholastica’s Academy batok sa Lagtang National High School.

Ang mga mokampiyon makadawat og P5,000 ug tropeyo.  (BANATSPORTS)