2011 Mayor Alegado Cup andam na

CEBU, Philippines - Ang gikahinaman nga 2011 Mayor Alegado Cup basketball tournament pormal na nga buksan karong Domingo didto sa Consolacion Sports Complex.

Seguradong dugokan ang opening day tungod kay gipahibalo ni tournament commissioner ug kanhi player sa Far Eastern University (FEU) Tamaraws sa UAAP nga si Paul Alelu Q. Flores, motambong ang usa ka inilang basketbolista sa PBA nga si Arwind Santos sa Petron Blaze Boosters.

Gipahibalo usab ni Flores, nga ang liga gibuak ngadto sa unom ka brackets.

Kini naglakip sa little mini (13-below), mini (15-above), Inter-barangay A ug B, Open Consolacion category ug Invitational Commercial division.

Si Consolacion Mayor Teresa P. Alegado nagkanayon nga ang katuyoan pagmugna sa liga mao ang paghatag og kalingawan ug magsilbe usab nga aktibidades aron malayo ang mga batan-on sa mga ginadiling drogas ug mga gangs.

Ang torneyo gisuportahan sab ni Vice Mayor Aurelio Damole uban sa mga sakop sa Sanggunian, sports organizer Nilo Ferraren, Association of Barangay Council (ABC) president Marilou Casul ug SK Federation chairperson Vito Rolito Villo.  (BANATSPORTS)