CEBU, Philippines - Ang sangka nilang Banal ug Briones maoy supporting bout sa WBO light flyweight championship tali ni Donnie 'Ahas' Nietes ug Ramon Garcia Hirales.
Higayon na kini ni Banal nga mamawi gikan sa iyang ngil-ad kaayong eight-round technical decision nga kadaugan batok ni Canadian fighter Tyson Cave niadtong miaging Hulyo 30.
Pulos dismayado ang mga boxing fans atol sa maong sangka nga naundang human makahiagom og dakung gisi sa walang kilay si Banal mugna sa accidental headbutt.
Gumikan niini, si ALA Promotions president Michael Aldeguer nakahukom nga iparang si Banal sa lig-on nga kontra aron makita gyud ang kalidad sa iyang boksidor.
Si Banal mosuway pagpakita og impresibong daog aron matubag ang gipangandoy niyang "rematch" batok ni Panamanian Rafael 'El Torito' Concepcion, ang bugtong boksidor nga nakapilde kaniya.
Ang 22-anyos nga si Banal nagbitbit og 25-1-1, 19KOs, samtang si Briones adunay 20-0, 14 KOs.
Team Bogart abante na sa semifinals
Kulbahinam kaayong duwa ang nasinati sa Bogart team dihang ilang gipatapsingan ang Roadside team, 51-50 aron mo-abante sa semifinals sa Lahug Inter-Sitio Fiesta basketball tournament didto sa Lahug Sports Complex.
Silang Onat Barriga ug kanhi CIT Wildkitten Robert Ortega maoy nakasalbar sa kampanya sa Bogart nga parehong miposa og 15 puntos.
Ang Roadside gipangulohan ni Tata Valen, kinsa miburak og 17 puntos.
Ang Bogart ni team owner Juntagz Bercede ug coach Naks Nuñez makigsangka batok sa MCCO sa semifinals. Laing magsangka sa semis mao ang Camagong 1 batok sa Camagong 2. - GGM (BANAT NEWS)