Pao-Heruela mibaswat sa UC

CEBU, Philippines - Gibaswat nilang Edward Pao ug Brian Heruela ang defending champion University of Cebu (UC) Webmasters pinaagi sa krusyal nga basket ug solidong depensa aron maka-ipsot ngadto sa kulba-hinam nga 88-84 nga kadaugan batok sa upset-seeking University of San Carlos (USC) Warriors kagabii atol sa pagsugod sa second round sa nagpadayong 11th Cebu Schools Athletic Foundation, Inc. (CESAFI) basketball season didto sa Cebu Coliseum.

Sa mga sangka sa high school, gikunis-kunis sa Sacred Heart School-Ateneo de Cebu (SHS-AdC) Magis Eagles ang Don Bosco Technology Center (DBTC) Junior Greywolves, 93-61 aron inaton ang ilang winning streak ngadto sa 9-0 ug sa preliminary game, gi-usban sa Cebu Institute of Technology-University (CIT-U) Wildkittens ang USJR Baby Jaguars pinaagi sa pag-iskor og impresibong 83-60 nga kadaugan aron pagmatuod nga ang ilang 59-56 nga daog sa first round dili usa ka taghap.

Ang sagunson nga singko puntos ni Pao lakip ang usa ka three-pointer nga maoy naghatag og 83-82 nga abante ug hugot nga depensa ni Heruela kinsa mibalik gikan naka-angkon og cramp, maoy nahimong yawe sa kadaugan alang sa Webmasters kinsa nabiyaan unta og siete puntos human sa third period, 55-62.

Ang ilang mga turn-overs ug ang pagka-foul trouble sa ilang 6-9 nga snetro nga si Junemar Fajardo maoy hinungdan nga nabiyaan ang Webmasters halos sa kinatibuk-ang duwa apan tungod sa pag-abag nilang Pao ug Heruela, nasalbar lang gihapon sila ilabi na kay wala sab makahuygo ang ilang top gunner nga si Robinson Mohammad kinsa igo lang mi-iskor og usa ka palito.

Mibahug og 27 puntos si Heruela aron pangulohan ang Webmasters samtang sila si Fajardo ug Pao midugang og 18 ug 13 puntos matag usa. Maayo sab ang opensa nga gipakita ni Luigi Bercede kinsa miamot og 12 puntos.

Si Giovanni Padillo maoy nangu sa Warriors sa iyang 22 puntos, midugang ug 15 puntos si Sam Hermosa ug miabuno’g 14 ug 11 puntos matag usa silang Cid Cortes ug Michael Cantonao.

Puntos matag usa:

UC (Srs.) 88— Heruela 27, Fajardo 18, Pao 13, Bercede 12, Ampoon 9, Caytuna 4, Aranas 4, Mohammad 1

USC (Srs.) 84— Padillo 22, Hermosa 15, C. Cortes 14, Cantonao 11, Bautista 8, Panerio 7, Codilla 6, Otida 1.  - BANAT NEWS