Melindo Mi-TKO sa Mehikano

CEBU, Philippines - Subling gipamatud-an ni ALA Boxing Gym superstar Milan “El Metodico” Melindo nga hinog na siya alang sa usa ka world title shot human siya mihimo og usa ka impresibong TKO nga kadaugan batok ni Mexican Francisco “Chiquita” Rosas aron pagsakmit sa WBO Intercontinental flyweight title sa miaging gabii sa “Pinoy Pride 8: Philippines vs. Mexico” didto sa Waterfront-Cebu City Hotel and Casino.

Bisan pa og pakyas siya pag-iskor og knockout, daku gihapon kadto nga kadaugan ni Melindo (25-0, 9KOs) kinsa mikulata sa nagkadugo nga Rosas (22-9-2, 13KOs) kinsa wala gyud kaarte batok sa ALA fighter.

Gihunong ni referee Bruce McTavish ang away sa paghuman sa round 10 dihang naglisud na ang trainer nga si Hermino Vega Ramirez paghunong sa grabeng pag-agas sa dugo gikan sa ilong ni Rosas.

Ngilngig ang gipakitang abilidad sa 23-anyos nga si Melindo kinsa mipatugpa og mga kusug nga kombinasyon ngadto sa ulo ug lawas ni Rosas kinsa overweight og five pounds.

Atol sa fourth round, diriyot tumbaha ni Melindo si Rosas pinaagi sa usa ka left hook sa apapangig, apan daling nakabawi ang Mehikano.

“Lig-on gyud. Nakita gyud ang epekto sa iyang pagka-overweight maong wala natumba, pero kun nisunod pa to sa saktong timbang si Rosas, dugay rato nahayang,” matud pa ni ALA chief trainer Edito Villamor.

Giangkon ni Melindo nga sayu unta niyang tapuson ang away, apan nakabantay siya sa talagsaong kagahi ni Rosas kinsa mihilam-os sa tanan niyang kinumo. “First round ta to nako tumbahon pero nakabantay ko nga dali ra man maka-recover bisan og ma groggy,” dugang pa niya.

Sa iyang bahin, si ALA Promotions CEO Michael Aldeguer mibilib sa gipakita ni Melindo og nagplano nga hatagan og usa ka world title eliminator ang Cagayan de Oro fighter.

“There's no question that Milan is ready for a title fight, but the problem here is his reputation as a very dangerous fighter in his division (flyweight) that makes difficult for us to get a world champion that is willing to risk his title,” matud pa ni Aldeguer. “With this fight, Milan will go up in ranking and from there, we will look into maybe a title eliminator next year.”

Sa laing bahin, nakahiagum sa ikaduhang pilde sa iyang karera ang 19-anyos nga si Jason “El Niño” Pagara (27-2, 16KOs) human siya gipilde pinaagi sa unanimous decision sa Mehikanong si Rosbel "Lobito” Montoya (35-4-1, 29KOs).

Midaog hinuon ang ALA newcomer nga si Genesis “Azucal” Servania (15-0, 5KOs) batok sa beteranong Mehikano nga si Gerson ‘El Nene” Guerrero (34-9, 26 Kos).  - BANAT NEWS