Second round sugdan karon

CEBU, Philippines - Tinguha karon sa walay pildeng defending champion University of Cebu (UC) Webmasters nga mokulit sa ilang ikapitong daog aron pahugtan ang liderato dihang ilang ikasangka ang University of San Carlos (USC) Warriors sa pagsugod sa second round sa elimination sa 11th Cebu Schools Athletic Foundation, Inc. (CESAFI) basketball season diha sa Cebu Coliseum.

Sa una nilang panagbagat, midaog ang Webmasters, 77-67 niadtong Agosto 9, apan karong higayona, dili na makayano-yano ang Webmasters sa ilang mga kaatbang kay naghimo na sab kini’g mga adjustments ug usa sa gitun-an niini mao ang pagsumpo sa 6--foot-9 center nga si June Mar Fajardo.

Bisan tuod ug sila maoy labing lig-on nga team karon nga season, dili hinuon consistent ang Webmasters ilabi na kun depensa ang hisgotan. Gani, duha na ka higayon nga kanunay silang gihulga sa dili mga lig-ong contenders -- ang una batok sa University of San Jose-Recoletos (USJ-R) Jaguars diin midaug sila sa overtime, 95-87 opening day sa Agosto 7 ug ang ikaduhang kulbahinam nga resulta dihang igo lang silang naka-ipsot batok sa University of Southern Philippines Foundation (USPF) Panthers, 62-61   pagtapos sa first round niadtong Agosto 31.

Duha kadto ka leksiyon nga angayan tun-an sa Webmasters kun seryoso gyud sila sa ilang title retention bid tungod kay kun padayon silang magsalig sa opensa ni Fajardo, mao kini ang magbutang nila sa delikadong kahimtang sa higayon nga madepensaan og maayo ang naulahi.

Nagkinahanglan si Fajardo sa suporta sa ilang gunners nga sama nilang Robinson Mohammad, Gerald Ampoon ug John Michael Auditor ug ingon man usab sa hugot nga depensa nilang Luigi Bercede ug Roger Caytuna.

Kinahanglan sab nga mosuporta sa opensa silang Edward Pao, John Raphael Aranas ug big guard Quinton Heruela.

Sa ilang bahin, ang Warriors mosalig sa ilang field shooting nga kanunay nilang gigamit isip hinagiban uban ang panghinaut nga mangigo silang Giovanni Padillo, Michael Cantonao, Sam Hermosa ug posible gikan nilang Mark Panerio, Nilton John Otida ug Jacques Bautista.

Gitapos sa Warriors ang first round isip no. 3 qualifier bitbit ang 4-2 nga baraha. (BANAT NEWS)