R.A. Essentials nidaog sa Linao All Stars

CEBU, Philippines -  Gipukan sa R.A. Essentials nga gipangulohan ni Ric Bastida ang Linao All Stars, 105-94 sa exhibition game niadtong Domingo atol sa pagbukas sa fiesta tournament didto sa barangay Cuanos, Minglanilla, Cebu.

Sikit kaayo ang duwa gikan sa pagsugod hangtod natapos ang first half diin igo lang milabaw og usa ka punto ang R. A. Essentials sa halftime, 51-50.

Gikan niadto, ang R.A. Essentials ni playing coach Jojo Pada migamit og hugot nga depensa inubanan sa pagmangtas ni kanhi UV Lancer Rene Toring, kinsa mi-iskor og 15 puntos sa iyang kinatibuk-ang 31 puntos.

Miabag sab sa opensa ang high-leaping point guard nga si Rondyl Roncal nga mibahog og 20 puntos, samtang ang beteranong ex-UC star nga si Julius Gastador midugang og 18 puntos.

Ang ex-PBA nga si Danny Aying miamot sab og double figures pinaagi sa iyang 14 puntos.

Sila si Kay Fuentes ug Janzel Cañada maoy nangu sa Linao All Stars sa ilang 35 ug 27 puntos matag usa.

Ang maong exhibition game nahimong posible tungod sa paningkamot ni Cuanos Brgy Capt. Ramil Traya uban sa suporta sa iyang mga konsehales nga sila si Simplicio Bastida, Junnifer Campo, Roel Labrador, Cris Labrador, Ronnie Obcial, Archie Sator, Raul Obcial ug sa ilang SK Chairman Alvin Bastida.

Puntos matag usa

R.A. ESSENTIALS (105) - Toring 31, Roncal 20, Gastador 18, Aying 14, Cedullo 5, Bastida 4, Zamora 3, Pada 2, Dela Cruz 2, Sico 2, Ang 2, Endab 2

LINAO ALL STAR (94) - Fuentes 35, Cañada 27, Adlawan 8, Delima 7, Santos 4, Manatad 3, T. Ocañada 2, O. Ocañada 2, Dela Calzada 2, Lumanog 2, Baliong 2 (BANAT NEWS)