MANILA, Philippines - Pilit na popormalasihin ng Ateneo De Manila University ang kanilang pagpasok sa Final Four sa pakikipaglaban sa Philippine Air Force ngayong alas-4 ng hapon sa pagwawakas ng quarterfinal round ng Shakey’s V-League Open Conference sa The Arena sa San Juan.
Sa unang laro sa alas-2, magsasagupa naman ang semifinalist San Sebastian College at nanganganib na Maynilad.
Ang Philippine Army (4-1) at San Sebastian (3-1) ang unang mga nakakuha ng tiket sa Final Four, habang umaaasa namang makakasama sa kanila ang Ateneo (2-2), Philippine Navy (2-3), Air Force (1-3) at Maynilad (1-3).
Magkakaroon lamang ng isang four-way tie para sa dalawang natitirang semifinals seat kung mananalo ang Air Force at Maynilad.
Ang Lady Eagles, Lady Sailors, Water Dragons at Airwomen ang maglalaban para sa dalawang playoff matches na dedetermina sa aangkin sa huling dalawang silya sa Final Four.
Muling pamumunuan nina Fille Cainglet, Alyssa Valdez, Gretchen Ho, Dzi Gervacio, Aerieal Patnongon at Jamenea Ferrer ang Ateneo kontra kina Aiza Maizo, Jennifer Manzano, Liza Deramos, Wendy Semana, Amelia Guanco at Irish Patrona ng Air Force.
Sa unang laro, asam ng Lady Stags na makabawi mula sa isang four-set loss sa Lady Troopers sa kanilang huling laro noong Setyembre 1 sa pakikipaglaban sa Water Dragons.
Itatampok ng San Sebastian sina leading scorer at spiker American Lauren Ford, Thai import Jeng Bualee, Joy Benito, Rubie de Leon, Jill Gustilo at Dafna Robiños katapat sina Joy Cases, Syvie Artates, Nica Guliman, Mervic Mangui, Ma. Josephine Cafranca, Beverly Boto, setter Charisse Ancheta, liberos Joanne Ayson, Marie dela Peña at guest player April Hingpit. (