CEBU, Philippines - Buksan na ugmang adlawa ang Talisay City Mayor’s Cup 2011 basketball tournament didto sa Talisay City Sports Complex sa Poblacion sa nahisgutang dakbayan.
Usa ka parada nga salmotan sa 32 ka koponan ang motimaan sa pagsugod sa maong dakung sports event sa maong siyudad.
Sugdan ang parada sa alas-2 sa hapon ug adto kini manukad sa Talisay City Hall paingon ngadto sa Talisay City Sports Complex.
Si 1st District Representantive Eduardo R. Gullas, maoy pinasidunggan dinapit ug mamumulong sa opening ceremony.
Gibahin ang torneyo sa tulo ka dibisyon -- Sangguniang Kabataan (SK), Seniors ug Open division.
Ang SK division gilangkuban sa Camp 4, Cansojong, Dumlog, Jaclupan, Lagtang, Lawaan I, Lawaan 3, Mohon, Poblacion, Pooc A, Pooc B, San Isidro, San Roque, Tabunok ug Tanke.
Ang Seniors division pangulohan sa Cansojong, Dumlog 1, Dumlog 2, Mohon, Lawaan 1, Poblacion 1, Poblacion 2, Pooc, Tabunok ug Tanke, samtang magsangka sa Open division mao ang Jocyn, C&J, MRB, JYSR - Bulacao, Digul, Sta. Cruz, ug Colis.
Gipasiugdahan sa Talisay City Sports Commission (TCSC), ang usa ka buwan nga kompetisyon gipaluyohan sab sa Talisay City Government. (BANATSPORTS)