Baby Saints tinalo ng Hawklets para sa 8-0 sweep
MANILA, Philippines - Pinalawig ng University of Manila ang kanilang winning streak sa walong dikit matapos pabagsakin ang host school St. Clare College, 101-80 at walisin ang first-round ng 11th NAASCU junior basketball tournament sa UM gym.
Sumandig ang Hawklets sa troika nina John Lenyer Santos, Yves Maverick Nicholas at Rodolfo Marticio upang ihatid ang Sampaloc-based dribblers sa panalo sa nine-team tournament na inorganisa ni NAASCU president Dr. Ernesto ‘Jay’ Adalem.
Bumandera si Santos sa kanyang inilistang 25 puntos, nagdagdag naman sina Nicholas at Marticio ng 24 at 22 puntos, ayon sa pagkakasunod para sa Hawklets na naligtasan ang matinding hamong inilabas ng Baby Saints sa panimula ng final canto bago kumawala tungo sa kanilang panalo.
Nanguna naman sa Baby Saints si Jezer Calma na tumapos ng 25 puntos sa kabila ng pagdausdos ng Caloocan-based cagers sa 5-3 win-loss slate.
Sa iba pang laro, tinalo ng defending champion Our Lady of Fatima University ang Informatics International Coleges,120-69 at ginapi ng AMA Computer University ang mahigpit na karibal na STI Colleges, 86-80.
Ang panalo ay naghatid sa Baby Pheonix sa 5-3 win-loss slate kung saan nagpakitang gilas si Jefferson Arceo na tumapos ng game-high 32 puntos.
- Latest
- Trending
