CEBU, Philippines - Diriyot masuhong ang kampanya sa defending champion University of Cebu (UC) Webmasters sa ilang tumong nga 6-0 first round sweep dihang naka-ipsot kini batok sa University of Southern Philippines Foundation (USPF) Panthers, 62-61, niadtong Miyerkules sa gabii sa 11th Cebu Schools Athletic Foundation, Inc. (CESAFI) basketball event diha sa Cebu Coliseum.
Sa sayo pa, ang Sacred Heart School-Ateneo de Cebu (SHS-AdC) Magis Eagles mibuntog sa University of the Visayas (UV) Baby Lancers sa iskor nga 79-73 aron magpabiling walay pilde human sa lima ka duwa.
Naglabaw og nuybe puntos ang Webmasters sa katapusang tres minutos, apan mihiyos kini ngadto na lang sa tres puntos, 62-59 sa nahabiling 22 segundos sa duwa. Nahimong kulbahinam ang duwa dihang mi-iskor si Fritz Dajalos aron pagsikit sa duwa, 62-61, apan didto ra kutob ang ilang mga paningkamot kay nahutdan na kini sa oras.
Bisan si June Mar Fajardo maoy mihakot og 18 puntos, ang low-scoring ballgame nagpaila nga mikompiyansa ang Webmasters ug daw wala nila tinud-a ang duwa.
Si Robinson Mohammad miposa og upat ka triples alang sa iyang 12 puntos ug mao sab nakuha ni Edward Pao alang sa habig sa Webmasters, samtang si James Ferraren maoy nangu sa Panthers sa iyang 21 puntos, gisundan ni Joseph Sedurifa nga adunay 11 puntos.
Sa laing bahin, si Jari Igna mi-iskor og singko puntos sa katapusang 57 segundos sa duwa aron baswaton ang Magis Eagles ngadto sa krusyal nga kadaugan batok sa Baby Lancers.
Nagtabla pa unta ang duha, 71-all pinaagi sa free throws ni Dawn Ochea sa SHS-AdC sa katapusang 1:14, apan kalit lang miantog og sunod-sunod nga singko puntos si Igna lakip ang usa ka lay-up aron inaton ang ilang labaw, 75-71 sa katapusang 35.4 segundos.
Si Julius Cadavis maoy topscorer sa Magis Eagles sa iyang 17 puntos, samtang si Igna midugang og 14 puntos. (BANATSPORTS)