Mondragon bagong PBA Chairman

HONG KONG - Balak ng bagong PBA board chairman na si Mamerto Mondragon ng Rain or Shine na palawigin ang PBA fan base at palakasin ang PBA D-League sa ha­ngaring masakyan ang matagumpay na 2010-11 PBA season.

Hangad ni Mondra­gon na maduplika ang kinitang P90 million income ng liga noong nakaraang season.

At optimistiko siyang mangyayari ito sa pama­magitan ng pinagandang three-conference format, isang bagong broadcast partner sa TV5 at ilang mga bagong players.

“It’s attainable,” sabi ni Mondragon sa pagtatapos ng PBA summit dito sa Holiday Inn Golden Mile Hotel sa Tsim Sha Tsui kahapon.

“We enjoyed a marked increase in gate attendance last season and we hope it to continue,” dagdag pa ni Mondra­gon.

Magsisimula ang 37th season ng PBA sa Oktu­bre 2.

“I’m still feeling my way around but the governors are there to assist me. I have to admit Season 36 under chairman Pardo was a tough act to follow, but we’ll really try our best (to achieve our goal in the coming season),” wika ni Mondragon.

Nangako naman ng suporta ang mga miyembro ng PBA Board kay Mondragon.

“I’m sure Attorney Mon­dra­gon is very able,” sabi ni dating PBA chairman Rene Pardo ng B-Meg. “And he will have the 100 percent support of everybody.”

Naniniwala sina Mondragon at league commis­sioner Chito Salud na ang kanilang pagbisita sa mga barangay ang magpapa­lawak pa sa kanilang fan base.

Samantala, kumpiyan­sa naman si Pardo sa ma­giging kampanya ng kanyang Llamados.

“Kerby (Raymundo) is returning, and so is Rico (Maierhofer). So we’re rea­lly excited,” sabi ni Pardo, nakatakdang makipagkita sa kanilang bagong coach na si Richard del Rosario.

Sa pag-akyat ni Del Ro­sario, mentor ng St. Benilde Blazers sa NCAA, ibinaba naman ng SMC si Jorge Gallent bilang assistant coach. Dahil sa mga injuries, nalaglag ang B-Meg sa 20-24 win-loss record noong nakaraang season.

Muling isasalang ng Lla­mados sina Raymundo, Maierhofer, Rafi Reavis, Marc Pingris at Joe Devance.