Lopez, Tabal naghari sa "Run to stop TB"

CEBU, Philippines - Beteranong runner nga si Mendel Lopez maoy nanghawod sa "Run to Stop TB" kagahapon didto sa Parkmall carpak sa north reclamation area.

Ang produkto sa University of Southern Philippines Foundation (USPF) ug karon usa na ka engineer nga si Lopez milupig ni Kenyan marathoner Abraham Missos aron maangkon ang titulo sa 21K men’s class.

Gitapos ni Lopez ang lumba sa oras nga 40:18.925, labaw lang og tulo ka segundos batok sa nagsunod niining si Missos sa oras nga 40:22.552. Si Joebert Carolino mi-okupar sa ikatulo sa oras nga 45:51.793.

Sa pikas bahin, padayon gihapon nga nidominar sa lumba si Mary Joy Tabal human siya misakmit og laing korona sa 21K women’s category sa oras nga 49:42.665. Sila si Madelyn Carter (54:46.550) ug Christine Lagnason (56:19.596) maoy miangkon sa ikaduha ug ikatulo nga dapit.

Ang runner partner ni Tabal nga si John Philip Duenas maoy naghari sa 6K men's run human iyang gitapos ang dagan sa oras nga 21:30.660. Si Adonis Singson (21:41.480) mipahiluna sa ikaduha, gisundan ni Aldrin Agang (21:57.230) alang sa ikatulo.

Ang top three finishers sa 6K women’s mao sila si Christy Tutor (26:25.480), Jean Andrin (26:48.730) ug Criscel Diongson (27:57.330).

Naghari sa 3K run mao sila si Gabriel Sabate (10:08.190) ug Lovely Andrin (12:08.230). (BANAT NEWS)