CEBU, Philippines - Yano kaayong mikulit og daog ang defending champion University of Cebu (UC) Webmasters ug ingon man ang Southwestern University (SWU) Cobras batok sa ilang mga karibal sa 11th Cebu Schools Athletic Foundation Inc. (CESAFI) basketball event sa miaging gabii diha sa Cebu Coliseum.
Ang Webmasters mikulit sa ikalimang daog human ilang giihaw ang Cebu Institute of Technology-University (CIT-U) Wildcats, 100-81 ug usa na lang ka daog aron makompleto ang six-game elimination round sweep, samtang ang Cobras milubong sab sa University of San Jose-Recoletos (USJ-R) Jaguars sa iskor nga 83-59 alang sa ilang ikaduhang daog sulod sa lima ka duwa.
Sa mga sangka sa sekondarya, ang University of the Visayas (UV) Baby Lancers mitumba sa Baby Jaguars, 85-77 aron magpabiling way pilde sulod sa lima ka duwa , samtang ang Junior Webmasters midaog na gyud sa labing unang higayon human gipakaging ang Wildkittens sa iskor nga 79-64.
Walay nakapiog sa pagmangtas ni Robinson Mohammad, kinsa mipabuto og pito ka triples sa iyang 25 puntos, samtang si 6-foot-9 center June Mar Fajardo ug Edward Pao nikontrolar sa rebounding department. Sila si Fajardo ug Pao nagkumboya og 21 puntos sa maong kadaugan. Si John Raphael Aranas mitampo og 16 puntos, samtang si Quinton Brian Heruela miamot og 13 puntos.
Ang kanhi UC juniors nga si Floyd Taboada mirehistro og game-high 27 puntos aron pangulohan ang 0-5 nga Wildcats, samtang si Chester Curso mitampo og 21 puntos. Laing ex-UC juniors nga si Alexander Nazareno miposa og 14 puntos.
Si Justin Aboude maoy nangu sa Cobras ni coach Raul 'Yayoy' Alcoseba pinaagi sa iyang 20 puntos, samtang ang 1-4 Jaguars gipangulohan ni Abulaiz Suliman sa iyang 19 puntos.
Puntos Matag Usa
Unang duwa:
SWU (83) - Aboude 20, Armecin 12, Pacquiao 10, Guillena 9, Bregondo 8, Nalos 7, Arong 5, Escobio 3, Casquejo 3, Ortuyo 2, Castro 2, Padilla 2
USJ-R (59) - Suliman 19, Nudalo 8, Sanchez 7, Olbedado 6, Genodiala 6, Capillar 6, Martinez 4, Tabalic 3, Abing 2, Lajato 1
Ikaduhang duwa:
UC (100) - Mohammad 25, Aranas 16, Heruela 13, Fajardo 12, Pao 9, Bercede 8, Bagnol 7, Batino 4, Auditor 4, Ampoon 2
CIT-U (81) - Taboada 27, Curso 21, A. Nazareno 14, Dimco 6, Taghoy 4, Brigoli 4,Sanchez 2, D. Nazareno 2 (BANAT NEWS)