Football tournament sa Consolacion
CEBU, Philippines - Laing kulbahinam nga football tournament ang ipahigayon sa Consolacion sa pagsikad sa "2nd Engineer’s Fiesta Cup" sa Oktubre 15 didto sa Sta. Lucia football field.
Ang football tournament adunay 12 ka kategoriya lakip niini ang players 6, 8 ug 10 class.
Ang solid boys division gibuak sa 12, 14, 17, 19 ug 38 above class. Anaa usab ang men’s open ug inter-company category.
May duwa sab alang sa kababayen-an sa paglakip sa 17-under ug ladies open class.
Ang seven-a-side invitational tournament gipasiugdahan ni Engr. Nilo Ferraren uban sa suporta sa lokal nga kagamhanan sa Consolacion ubos sa liderato ni Mayor Teresa Alegado ug Vice Mayor Aurelio Damole.
Niadtong mga interesadong mosalmot, mahimong motawag ni tournament commissioner Ryan Villegas 0917-623002 o ni match consultant, Sherwin Rodriguez sa 09222084405.
Gikatakdang himuon ang final meeting sa mga coaches karong Oktubre 8 didto sa San Roque Parish foodpark sa barangay Subangdaku, Mandaue City. (BANATSPORTS)
- Latest
- Trending
