Lady Stags target ang playoff
MANILA, Philippines - Matapos ang Philippine Army, ang San Sebastian College naman ang magtatangkang makasikwat ng playoff para sa isang semifinals seat.
Sasagupain ng Lady Stags ang Ateneo Lady Eagles ngayong alas-4 ng hapon sa quarterfinal round ng Shakey’s V-League Open Conference sa The Arena sa San Juan.
May 3-0 rekord ngayon ang Army sa single-round quarterfinals phase kasunod ang SSC (2-0), Ateneo (1-1), Philippine Navy (1-2), Philippine Air Force (0-2) at Maynilad (0-2).
Sa unang laro sa alas-2, maglalaban naman ang Water Dragons at ang Airwomen.
Tinalo na ng Lady Stags ang Lady Eagles via four-setter sa kanilang unang pagtatagpo noong Agosto 9 sa eliminasyon.
Pangungunahan ni American Lauren Ford, ang leading scorer ng liga, ang San Sebastian katuwang sina Thai import Jang Baulee, Joy Benito, setter Rubie de Leon at top receivers Mary Jane Pepito at Jill Gustilo.
Nanggaling sa isang five-set win ang Lady Stags sa Lady Sailors noong Agosto 25.
Umiskor naman ang Lady Eagles ng isang four-set victory laban sa Water Dragons noong Linggo.
Sa unang laro, magtatapat naman sina Joy Cases ng Maynilad at Aiza Maizo ng Air Force.
- Latest
- Trending
