Theam Cargo/Mambaling kampiyon na

CEBU, Philippines - Ang beteranong sentro nga si Danny de los Santos ug forward Wowie Escocio maoy nangunay og pangatake alang sa Theam Cargo/Mambaling aron tumbahon ang host Inayawan-Akira, 107-94 ug aron sab paglangkat sa korona sa St. Augustine Cup 2011 basketball tournament niadtong Domingo didto sa Inayawan Sports Complex.

Si De los Santos miugkat og 25 puntos, samtang si Escocio miabuno og 24 puntos. Gawas sa tandem nilang Delos Santos ug Escocio, misamot sab kalig-on ang Theam Cargo tungod sa presensiya ni ex-pro ug karon UV Green Lancers coach Felix Belano, kinsa wala lang moamot pag-ayo sa opensa, wala sab magpalupig batok sa laing kanhi-pro player nga si Jimwell Torion, kinsa mibahog og upat ka triples aron maoy mangu sa Inayawan sa iyang 25 puntos.

Sa makadaghang higayon, si Belano mao kanunay ang manalipod sa labaw sa Theam Cargo/Mambaling diin mohimo siya'g crucial baskets sa higayon   mohulga ang Inayawan. Si Belano, kinsa miposa og duha ka triples, misansan og 20 puntos.

 MihimoÆg mainitong rally ang Inayawan sa uwahing bahin sa third period dihang mi-iskor og duha ka "back-to-back" triples   si Victor Bacalso aron mosikit og maayo, 51-52, apan dali kining nabaraw dihang si Michael Sumayang mipasud og three-pointer aron hatagan ang Theam Cargo/Mambaling og 55-51 nga labaw.

Si Bacalso adunay lima ka triples sa iyang 17 puntos, samtang si Jun Capangpangan midugang og 20 puntos lakip ang upat ka triples.

Ang Theam Cargo/Mambaling ni konsehal Emier 'Bossing' Hamis miharos sa tanang unom ka duwa sa maong torneyo -- upat sa elimination ug tagsa sa semifinals ug finals.

Puntos Matag Usa

Theam Cargo-MAMBALING (107) - Delos Santos 25, Escocio 24, Belano 20, Balingit 11, Lopez 11, Sumayang 8, Daclan 4, Duran 2, Camay 2

Inayawan-Akira (94) - Torion 25, Capangpangan 20, Bacalso 17, Cabrera 8, Hoybia 8, Caputolan 7, Abasolo 2, Navares 2, Guangco 2, Cabo 2, Baguio 1.  - BANAT NEWS