MANILA, Philippines - Pinitas ng San Sebastian College ang kanilang unang panalo sa quarterfinal round matapos patumbahin ang Philippine Air Force, 25-19, 25-15, 25-15, sa Shakey’s V-League Open Conference kahapon sa The Arena sa San Juan.
Nagtumpok ng pinagsamang 26 kills sina Thai Jang Baulee at American Lauren Ford para sa ikalawang pananaig ng Lady Stags sa Airwomen matapos noong Hulyo 31.
Bumangon ang Recoletos-based spikers sa 16-18 pagkakaiwan sa first set bago kunin ang sumunod na siyam sa 10 points laban sa Air Force.
“Palagi kaming nahihirapan sa simula pero maganda naman ang inilaro ng mga players sa kabuuan ng laro,” sabi ni coach Roger Gorayeb sa kanyang Lady Stags.
Nagtala naman ng pinagsamang 26 hits sina Jill Gustilo, Rubie de Leon, Joy Benito at Janette Doria.
Sina Ford at Baulee ay may tig-13 kills para sa SSC, nasa isang five-game winning streak ngayon mula sa kampanya sa elimination round.
Sa ikalawang laro, muli namang binigo ng Philippine Navy ang Maynilad, 25-15, 25-23, 25-16, mula sa 13 at 12 hits nina Nene Bautista at Suzanne Roces, ayon sa pagkakasunod.