UC mangulo sa Team Bisdaks sa Milo National Finals

CEBU, Philippines - Milampos ang powerhouse University of Cebu (UC) sa pagsakmit sa ika-16 nilang Milo Little Olympics Visayas Regional title ug tungod niini sila ang mangulo sa kampanya sa "Team Bisdaks" alang sa Milo Nationals karong Nobiyembre didto sa Pangasinan.

Migawas na usab nga overall championsa secondary level ang walay pilde nga UC sa kinatibuk-an nilang 182 puntos. Gisundan sila sa Abellana National School (ANS) nga mihipos og 126 puntos ug dayon ang University of San Carlos (USC) sa ilang 99 puntos.

Ang UC maoy nidominar sa athletics ug swimming sa duha ka weekends nga sports tournament.

Uban sa UC nga mopalig-on sa Team Bisdaks mao ang mga gold medalist gikan sa elementary level champion USC (84.5 points) ug runners-up Sacred Heart School-Ateneo de Cebu (59.75) ug Cebu Institute of Technology (51.25).

Si Ricky Ballesteros, ang head sa Visayas delegation nagkanayon nga kompiyansa siya sa line-up sa Team Bisdaks nga mosakmit sa damgo nilang "three-peat" title didto sa Pangasinan.

Nalakip usab sa Team Bisdaks mao ang mga pambato sa nagkaidayang sporting events sama sa Pajo National High School ug Catmon Elementary School sa volleyball, Don Bosco Technological Center (DBTC) Greywolves sa football, USC sa chess, Catmon Central School sa sepak takraw ug Negros Occidental Schools sa taekwondo.  (BANATSPORTS)