3-0 tuyo sa Panthers

CEBU, Philippines - Suwayan sa University of Southern Philippines Foundation (USPF) Panthers pagkutlo sa ikatulo nilang sunod-sunod nga daog sa labing unang higayon ubos ni coach Raul Latonio Sr. dihang ilang hamagon ang University of San Carlos (USC) Warriors sa bugtong duwa sa collegiate sa nagpadayong aksiyon sa 11th Cebu Schools Athletic Foundation Inc. (CESAFI) basketball event karong gabii diha sa Cebu Coliseum.

Sa juniors division, mao sab nga tunghaan ang magsangka diin ang Baby Warriors ug Baby Panthers ang nagtinguha mokulit sa ilang unang daog.

Ang Panthers ubos sa Rose Aquarius jerseys, nagpakita og daku kaayong umento sa off-season ug gani ilang gipangpukan ang mga lig-ong contenders sa miaging 5th CESAFI Partner's Cup nga naglakip sa UC-Gaisano Capital, UV-Lion Tiger ug SWU San Marino Corned Tuna.

 Gawas pa niana, bugtong ang Panthers lang sa tanang upat nga miabante sa Partners' Cup semifinals ang nakasugakod batok sa bisitang University of the Philippines (UP) Fighting Maroons diin napilde lang sila sa overtime, samtang ang ubang teams yano kaayo gidemolis sa UAAP squad lakip na ang UC Webmasters nga gilubong og kapin sa 10 puntos. 

Medyo kasaligan na ang opensa sa Panthers ug maayo na sab ang dagan sa ilang depensa.

Sa gihapon, ang Panthers magsalig sa ilang leading scorer nga si Fritz Dajalos uban nilang Joseph Sedurifa ug beteranong point guard Randy Avila.

Dili sama kaniadto, ang Panthers may katakus na karon nga mohimo'g kinalit nga rally.  (BANATSPORTS)