Philippines naka-silver sa Universiade

CEBU, Philippines - Matod pa sa panulthion nga “hindi uuwing luha-an” ang Philippines dihang midaug sila’g usa ka silver medal didto sa nagpadayong 26th Summer Universiade sa Shenzhen, China.

Ang bugtong naka-silver mao si Samuel Thomas Morrison, usa ka pambato sa taekwondo kinsa mihimog kasaysayan alang sa Pilipinas isip unang atleta nga nakakuha’g medalya.

Ang 21 anyos nga si Morrison nagtungha sa Far Eastern University ug nahimong inila dihang midaug siya’g gold medal sa 2010 Korea Open. Iyang giharus ang upat niya ka kontra sa wala pa siya moyukbo sa Koreanong si Kim Hun sa iskor, 5-9 sa ilang gold medal match sa men’s -68 kg event

Mi-abante sa finals ang 5-11 nga Pinoy jins human siya modaug batok kang Wendell Grouby sa US Virgin Islands tungod kay wala kini mopadayon pagsalmot sa round of 32.

Iya sab gipilde si Christopher Dubois sa France, 13-10 atol sa round-of-16, midaug batok kang Almas Mukamanov sa Kazakhstan, 10-2, sa quarterfinal, ug dayon, midaug batok kang Idulio Islas sa Mexico, 5-4, sa semifinal.

Ang mga biktima sa South Korean nga si Kim naglakip kanilang Thomas Auger sa Austria, 13-0; Joshua Tercero sa CRC, 14-0; Levon Pashabezyan sa Armenia, 14-2 ug Cesar Mari Puerta sa Spain, 2-1.

Ang pag-angkon ni Morrison og silver nga medalya miduslit sa bag-ong paglaum sa Pilipinas nga nagpadala og 15-man taekwondo team nga gipaluyohan sa Federation of School Sports Associations of the Philippines (FESSAP) ubos sa ilang presidente nga si David Ong ug chef de mission Alvin Tai Lian.

“We’re proud of Morrison’s achievement. It’s a silver medal that glitters like gold. It’s clearly a big honor for the country,” matod pa ni Ong.

Ang 2010 Kazakhstan Asian Championship bronze medalist nga si Marlon Avenido sa University of Santo Tomas nagpakita sab og katakos human iyang gipukan si Nuttapong Limvattana sa Thailand, 4-3 sa ilang sudden death playoff aron maoy makigsangka kang Arman Yeremyan sa Armenia kinsa midaog sab batok kang Fernando Rios sa Spain, 4-3.

Ang laing mga pambato ug paglaum sa Pilipinas nga sila si Jade Zafra, Anjelay Perez, Devy John Singson, Julian Mickey Cordero ug Maria Cecilia Viray wala makalusot.  - BANAT NEWS