CEBU, Philippines - Mihipos ug 44 puntos si Kevin Durant aron pangulohan ang Goodman League sa Washington ngadto sa usa ka kulba-hinam kaayong 135-134 nga kadaugan batok sa Drew League gikan sa Los Angeles kanidtong Sabado sa gabii.
Ang mga NBA players gikan sa duha ka dakbayan nga ubos karon sa lockout nagduwa og usa ka exhibition game didto sa Trinity University diin may gibana-banang may 1,500 ang misaksi dihang gidawat ni Durant ang iyang tropeyo isip Most Valuable Player.
Nagdasok ang katawhan lakip na kanila ang mga sakop sa local ug national media diin ang uban nagyaka sa sawog.
“Yeah, it was,” matod pa ni Durant kinsang free throws sa kataposang 21 segundos maoy naghatag sa Goodman sa ilang usa ka puntong kadaugan. Ang iyang tapal kang James Harden nga iyang teammate sa Oklahoma City Thunder maoy nagselyado sa ilang kadaugan dihang misuway unta’g jumpshot si Harden sa baseline atol gyud sa buzzer. - BANAT NEWS