Tirong gyud

Nagkaduol na ang sangka ni kanhi pound for pound king Floyd Mayweather Jr. batok kang WBC welterweight champion Victor Ortiz sa Septiyembre 17. Nagkaanam usab ang kahinam sa mga Pinoy kun mosunod na ang gipanglantawang superfight tali ni Manny Pacquiao ug Mayweather. Apan una pa kini mahitabo kinahanglang masiguro sa duha nga makadaog sa ilang mga tagsa-tagsa ka mga kontra. Si Mayweather batok Ortiz ug si Pacman batok Juan Manuel Marquez karong Nobiyembre 12.

Si Mayweather tataw na kaayong modaog batok kang Ortiz kun sa tapad lang tan-awon. Sagad sa mga boxing fans nga atong nasugatan pulos gyud adto kang Floyd. Gani sumala pa sa boxing.examiner, 8-1 ang tapad sa duha didto sa US.

Si Ortiz aduna gyu'y kapabilidad mopatumba kang Mayweather, apan si Mayweather mas abtik, idlas ug kagubkob og kumo ilabi ang iyang counter punches.

* * *

Sa Pacquiao-Mayweather superfight, duna ba kahay tsansang mahitabo ni? Mao ni ang dakung pangutana. Hinuon si Mayweather wala man pud moingon nga dili siya mosukol kang Pacman! Ang iya lang daghan kaayo siya og kuskos-balungos! Daghan siyang pasangil batok kang Pacquiao maong nakasohan hinuon siya sa iyang pagkatabian. Sa amoa ang tawag sa mga tawong tabian "tirong."

Unsa man gyud diay ba ning steroids? Sumala pa sa atong pagduki-duki, ang steroid usa ka matang sa organic compound nga natural sama sa dietary fat nga cholesterol, sex hormones nga estradiol ug testosterone, mga anti-inflamatory drug nga dexametasone.

Di na lang ta maghisgot kaayo og lawom nga termino sa steroids kay di man ko doktor. Ari ta sa common steroids nga gamiton ug usahay giabusohan sa mga atleta nga mao ang Anabolic-Androgen Steroids nga adunay daghang hitsura.

Sumala pa sa National Institute on Drug Abuse (NIDA), ang steroids (Anabolic-androgenic steroids (AAS) usa ka synthetically produced nga male sex hormone testosterone.

Synthetically, nagpasabot ginama ra sa tawo ug dili natural. Anabolic nagpasabot makapadaku og mga muscles ug ang androgenic nagpasabot nga makapadugang sa pagkalalaki (dili sa parte lawas) kun dili pagka-macho ang dating. Dili ko moingon nga makadaot ang steroids, tungod kay daghan kini og gamit sa tawo ilabi na sa habig sa medisina. Basta dili lang siguro abusaran.

Apan usa sa gidudahan ni Mayweather kang Pacquiao mao ang paggamit daw niini og usa ka matang sa steroids butang nga gi-deny sa atong Pambansang Kamao. Pero karon sugot na man si Pacquiao sa gidemanda ni Mayweather nga Olympic style drug testing, nga usa sa labing kuti ug epektibong drug testing sa kalibutan. Nagpasabot ni nga wala mahadlok si Pacquiao nga may madiskubrehang kemikal sulod sa iyang lawas. Ambot lang kun unsa pay himuong rason ni Mayweather ini ug kahuman ani. Seguro di siya moaway kang Pacquiao kun di isibog ang kiha batok kaniya.

* * *

PAHIBALO: Ang Grand Sioux Alumni Council sa Alpha Sigma Omega-Sigma Chi Gamma International Collegiate Service Fraternity and Sorority milusad og fund raising campaign alang sa mga biktima sa mga sunog dinhi sa Sugbu. Ang deadline karong Septiyembre 3. Niadtong buot motabang, mahimong motawag sa GSAC officers.

PAGTULON-AN: Ang mga babag maoy labing makahadlok nga talan-awon kun ang imong pokus wala sa imong buot kab-oton.

* * *

[email protected]