POC nanindigan sa 'di pagkilala sa PDBF
MANILA, Philippines - Sa pagdinig ng Youth and Sports Development Committee, sinabi ni POC Sec. Gen. Mark Joseph na ang pag-itsapwera sa PDBF bilang sports association ay salig lamang sa kanilang charter.
Ang kinikilala umano bilang sports association ay ang Philippine Canoe-Kayak Federation kung saan nabibilang umano ang discipline ng dragon boat na sinang-ayunan naman ni POC president Jose ‘Peping’ Cojuangco.
Ayon naman kay POC chairman Monico Puentevella, dapat ipagpasalamat pa ng PDBF ang nangyari dito dahil sa kabila ng kawalan ng suporta ng PSC at POC ay sobra-sobrang tribute ang natikman ng grupo at nabigyan ito ng parangal, monetary reward, at nakapasok pa ng Malakanyang.
Sinabi pa ng kongresista na umabot ng P55 milyon ang suporta nila sa dragon boat team hanggang nitong 2010 at nananalo pa rin naman sa competition pero hindi nabigyan ng tamang pagkilala.
Samantala, kung mayroon mang personalidad na kinainisan si Cojuangco, Jr. sa idinaos na hearing ng House Committee on Youth and Sports kaugnay sa isyu sa (PDBF) ito ay si dating Rep. Leonardo Montemayor ng ABA-Party List.
“Lahat dito ay gumagawa ng paraan para magkaroon ng reconciliation, maayos ang mga problema, gumagawa ng resolution,” ani Cojuangco. Sinabi ni Montemayor na gumamit si dating national equestrianne Mikee Cojuangco, anak ni Cojuangco, ng steroid para manalo sa kanyang individual showjumping event para sa gold medal sa 2002 Asian Games sa Busan, Korea.
At ito ang labis na ikinagalit sa kanya ni Peping.
Si Montemayor ay sinermunan naman nina House Committee on Youth and Sports chairman Rep. Renato Unico at Manila Rep. Amado Bagatsing dahil sa kanyang paninira kay Mikee. (Gemma Garcia/Russell Cadayona)
- Latest
- Trending
