SHS-AdC miangkon sa liderato sa CESAFI

CEBU, Philippines - Midagit sa ilang ikatulong sunod-sunod nga daog ang Sacred Heart School-Ateneo de Cebu (SHS-AdC) Magis Eagles batok sa Don Bosco Technology Center (DBTC) Junior Greywolves, 94-51 aron temporaryong mag-solo sa liderato sa juniors division sa 11th Cebu Schools Athletic Foundation Inc. (CESAFI) basketball event kagabii diha sa Cebu Coliseum.

Nakapanimaho na og daog ang Magis Eagles sayong bahin sa third period dihang ilang gibundakan og mga puntos ang Junior Greywolves, kinsa wala na kaayo makapugnit og puntos.

Ang Magis Eagles, ang losing finalists sa miaging tuig ngadto sa kasamtangang kampiyon Cebu Eastern College (CEC) Dragons, nagtangag karon og 3-0 nga baraha, samtang ang DBTC nakig-uban sa USC Baby Warriors nga adunay managsamang 0-2 win-loss records.

Ang higanteng si Julius Cadavis, maoy nangu sa Magis Eagles pinaagi sa iyang 16 puntos, gisundan ni Dawn Henric Ochea nga adunay 15 puntos.

Si Jose Marlo Pono mao sab ang nangu sa Junior Greywolves nga mitusak sab og 16 puntos. (BANATSPORTS)