CEBU, Philippines - Pabiling walay pilde sa pito ka away si ALA rising prospect Albert 'Prince' Pagara dihang iyang gipaundang sa ikaupat nga hugna si Rogen Flores sa main event sa ALA Promotions boxing card niadtong Miyerkules sa gabii didto sa Maasin City gymnasium.
Ang 17-anyos nga si Pagara unang mipatumba ni Flores sa makaduha ka higayon sa second round, hinuon mibangon ang taga-Dipolog City nga boksidor aron mopadayon sa away.
Mibawos si Flores sa third round gamit ang mga body shot, apan wala kini makatandog ni Pagara, kinsa misukli sab og mga hait nga suntok.
Sa misunod nga hugna, si Pagara walay kukaluoy nga mirombo ni Flores ug iya kining gihatod sa corner aron adto niya ipabuhagay ang bangis nga kombinasyon hinungdan nga giundang ang away, 2:43 sa round four.
Ang manghod ni light welterweight sensation Jason Pagara nga si Albert mirehistro sa ikaunom niyang knockout nga kadaugan sud sa pito ka away, samtang si Flores nakahiagom sa iyang ikalimang pilde sud sa 17 ka away.
Uban ni Pagara nga midaog mao ang iyang stablemate ug suod nga higala nga si Boyce Sultan human niya gipahayang sa unang round si Hagibis Quiñones. Samtang si Ivor Lastrilla midaog sab pinaagi sa first round TKO batok ni Marben Layos. (BANATSPORTS)