UC seguro na sa ika-16 nilang titulo

CEBU, Philippines - Naglawig na ang University of Cebu (UC) alang sa ika-16 nilang sunod-sunod nga Milo Regional title human milabaw og daku sa points tally sa nagpadayong 16th Milo Little Olympics-Visayas Regional Finals diha sa Cebu City Sports Center.

Bisan og aduna pay nahabiling duwa, lisud na kaayong labwan ang higanteng labaw sa powerhouse UC, kinsa milublob sa unang dapit sa secondary level sa ilang 140 points.

Karong weekend tiwason ang nahibiling mga duwa naglakip sa badminton, chess, scrabble, taekwondo, tennis ug volleyball. Bisan pa og mapakyas ang UC sa maong mga duwa dili gihapon kini makatarog sa nahimutangan.

Gitukod sa UC ang dominanteng labaw human nangharos ang ilang   mga atleta sa athletics ug swimming nga maoy duha sa duwa nga adunay labing daghang events.

Layo usab kaayo og biya ang defending champion sa ilang second placer nga Abellana National School (ANS) nga mikolekta og 46.5 puntos, samtang ang University San Carlos (USC) nalagpot sa ikatulo sa ilang 39 puntos.

Sukwahi sa secondary division, sikit ang lumba alang sa kampiyonato sa elementary category diin naglabaw lang og sayes puntos ang defending champion Sacred Heart-Ateneo de Cebu (56 points) sa second placer nga Cebu Institute of Technology-University (CIT-U) nga adunay 50 puntos.

Wala sab magpalupig ang out-of-town athletes sa University Bohol nga nakapasurpresa sa organizers dihang nasulod kini sa top three placers sa ilang 39 points.  (BANATSPORTS)