Pañeros ug Los Demonyos 2-0 sa 7th IBP

CEBU, Philippines - Parehong mikulit og managlahing daog ang Pañeros quintet ni skipper Nilo Balorio ug ang Los Demonyos ubos sa bag-ong coach nga si Norwin Honoridez kaniadtong Sabado aron magtabla sa 2-0 nga baraha sa elimination round sa nagpadayong 7th IBP Governor's Cup-2011 basketball tournament didto sa Capitol Parish gym sa dalan Escario, ning dakbayan.

Bisan sa dili kaayo impresibong duwa, midaug ang Pañeros batok sa Primos Inter Pares, 74-68 samtang gilubong sa Los Demonyos ang Jodin, 72-59.

Hinay ug luyahon ang pagsugod sa Pañeros kinsa didto na magsugod og arangkada sa second period aron molabaw og 13 puntos sa halftime, 43-30 pinaagi sa mainitong tandem nilang Balorio ug Bert Ruaya kinsa maoy nagpasiugda sa kusganong opensiba.

Sa laing bahin, nagmangtas sila si Bads del Prado ug Lito Ortiz kinsa maoy nangu sa balanse nga opensa alang sa Los Demonyos ug parehong miposa og 11 puntos matag usa samtang si Marchel Sarno maoy nangu sa Jodin sa iyang 10 puntos.

Sa laing duwa, midaug ang Super Idols ni captain ball Bong Pepito batok sa walay daug-daug nga Bhutakalz, 67-51 alng sa una nilang kadaugan sulod sa duha ka duwa.

Ang Super Idols gipangulohan nilang Fermin Pepito ug Benjo Macion kinsa mihakot og 17 ug 14 puntos, matag usa samtang si Khan Guieb maoy nangu sa Bhutakalz sa iyang 13 puntos.

Sa ika-upat ug kataposang duwa niadtong Sabado, midaug ang Eagles ni Kit Enriquez pinaagi sa usa ka upset batok sa defending champion Pecandela Law Firm ni skipper Francis Pepito pinaagi sa pag-eskapo ngadto sa 53-51 nga kadaugan.

Silang Jan Vallecer ug Dwight Remedio miposa og 10 puntos matag usa alang sa Eagles samtang sila si Jessie Capoy ug Francis Pepito maoy nangu sa sa Pecandela sa ilang 15 ug 11 puntos matag usa.

Puntos matag usa:

First Game:

PAÑEROS (74)- Balorio 16, Ruaya 10, Manching 9, Busi 8, Calipayan 6, Molde 6, Ordeniza 4, Aliño 4, Cagulada 4, R. Pepito 4, Denopol 3. 

PRIMOS (68)- Miralles 17, Villegas 12, M. Rama 10, Limalima 10, Velez 8, Sususco 4, Seville 3, Quiban 2, En. Rama 2. 

Second Game:

DEMONYOS (72)- Ortiz 11, Del Prado 11, Riveral 8, Flores 6, E. Bauzon 6, R. Bauzon 6, Tambago 6, Boholst 5, Pintor 4, Bragat 3, Salcedo 2, Yap 2, Montealegre 2. 

JODIN (59)- Sarno 10, Capahi 9, Narido 8, Reyes 8, Presas 8, Elmido 6, Geotina 3, Lucido 3, Amores 2, Dinsay 2 (GGM)(BANAT NEWS)