Lady Stags may tiket na sa quarters
MANILA, Philippines - Kasabay ng patuloy na pag-angkin sa liderato, sinungkit naman ng San Sebastian College ang unang quarterfinals ticket nang gibain ang Maynilad, 25-10, 25-14, 25-14, sa Shakey’s V-League Open Conference kamakalawa ng gabi sa The Arena sa San Juan.
May 4-1 baraha ngayon ang San Sebastian kasunod ang Philippine Army (3-0), Philippine Air Force (2-2), Philippine Navy (2-1), Ateneo De Manila University (2-3), Maynilad (1-2) at Perpetual Help (0-5).
Ito ang pangatlong dikit na arangkada ng Lady Stags matapos igupo ang Perpetual at Ateneo.
Kaagad na kinontrol ng San Sebastian ang laro matapos ang pitong puntos na inihataw nina Thai import Jang Baulee at American Lauren Ford sa first set laban sa depensa ng Maynilad.
Naglista si Baulee ng 13 kills para sa kanyang 16 points, habang tumipa si Ford ng 13 hits, kasama ang 4 blocks, at may 11 points naman si Rubie de Leon para sa Lady Stags.
May tig-7 points sina Nica Guliman at Joy Cases at 5 points si Syvie Artates para sa Maynilad, nagmula sa isang five-set win sa Perpetual.
- Latest
- Trending
