Pecandela gisubha'g daog

CEBU, Philippines - Gisubhan og daog ang defending champion Pecandela Law Firm nga gipaluyohan sa Mactan Rural Bank dihang ilang gipilde ang Bhutakalz, 64-55 samtang midaog sab ang Pañeros nga gipangulohan sa ilang playmaker nga si Dennis Aliño batok sa mas paboritong Super Idols, 82-77 sa pagbukas sa 7th IBP Governor’s Cup 2011 basketball tournament didto sa Capitol Parish gym sa Escario st., ning dakbayan.

Bisan sa luya sa pagsugod, nakahimo gihapon paglabaw ang Pecandela sa fourth quarter, 43-42 pinaagi sa tandem nilang Sam Malazarte ug Mark Russ Gamallo.

Sa fourth period, miarangkada ang Pecandela aron moposte og otso puntos nga bentaha, 21-13 sa wala pa mokulit og nuybe puntos nga kadaugan.

Si Malazarte miposa og 18 puntos, samtang si Gamallo midugang og 11 puntos alang sa Pecandela, samtang sila si Van Ligutan ug Jundy Codera maoy nangu sa Bhutakalz nga nagkumboya og 23 puntos.

Sa laing duwa, ang Pañeros midaog pinaagi sa overtime batok sa Super Idols sa iskor nga 82-77

Ang jumpshot ni Tats Retuya sa nahibiling otso segundos maoy naghatod sa duwa ngadto sa overtime human magtabla paghuman sa regulasyon, 66-all.

Ang playmaker nga si Dennis Aliño maoy nangu sa Pañeros sa iyang game-high 22 puntos, samtang sila si Nilo Balorio ug Michael Molde miamot og 12 puntos matag usa.

Ang Super Idols gipangulohan ni Fermin Pepito pinaagi sa iyang 21 puntos, gisundan ni Bert Dumon nga adunay 12 puntos.

Midaog ang Jodin team ni Allan Geotina batok sa Primos Inter Pares ni Enrique Rama sa iskor nga 54-51, samtang ang Los Demonyos ni Bads Del Prado midaog sab batok sa Los Eagles ni Kit Enriquez, 66-60.

Ang torneyo nahimong posible pinaagi sa pagpaluyo sa Cellpod, Atty. Margarita F. Yu, Bionic-Cebu, Bads, Primary Homes, Inc. Du Ek Sam, Inc. Mactan Rural Bank, Equicredit ug English Fella. (BANATSPORTS)