Igot Trucking disgrasya sa team Radaza

CEBU, Philippines - Nahimong bayani si Mario Bancale sa 59-58 nga kadaugan sa Harry Radaza team pinaagi sa free throw sa nahabiling dos segundos sa duwa sa LLBA Rollway Customs Brokerage Cup 2011 basketball tournament didto sa Villas Magallanes gym, Lapu-Lapu City.

Malugwayan pa unta og singko minutos ang duwa dihang nagtabla ang iskor, 58-all human mituasik ang triple ni Paradillo sa nahabiling 20 segundos sa final period, apan si Bancale nga gi-foul ni Nido Intud mitusak og usa sa iyang duha ka free throws sa katapusang dos segundos nga maoy nagselyo sa kadaugan.

Mikandos og 21 puntos si Bancale aron pangulohan ang kadaugan, gisundan ni Cordero sa iyang 17, samtang si Acuña mihakot og 10 puntos.

Ang naparot nga Igot Trucking ni team owner Junar Igot gipangulohan sab ni Jimboy Igot, kinsa miariya og 11 puntos.

Gipasiugdahan sa Lapu-Lapu Basketball Association, ang torneyo gipaluyohan sab ni Rolly dela Pieza, Dr. Michael Ouano ug sa JB Sportswear ni Billy Nadado. (BANATSPORTS)