CHINESE TAIPEI--Lumapit sa isang semifinals ticket ang Smart Gilas Pilipinas matapos paluhurin ang United Arab Emirates, 95-60, sa William Jones Cup kahapon dito sa Hsinjhuang Stadium sa New Taipei City.
Kumolekta si naturalized Marcus Douthit ng 23 points mula sa kanyang 8-of-11 fieldgoal shooting bukod pa sa kanyang game-high 13 rebounds para sa 4-2 baraha ng Nationals.
Nagdagdag naman sina Fil-Ams Chris Lutz at Marcio Lassiter at Asi Taulava ng 13, 10 at 10 points, ayon sa pagkakasunod.
Para makapasok sa semifinals, kailangang talunin ng Smart Gilas ang Japan (3-3) ngayong alas-5 ng hapon.
Habang isinusulat ito ay nakikipaglaban ang Korea (5-0) sa host Chinese Taipei (4-1) kasunod ang reigning back-to-back champion Iran (3-2) at Jordan (3-2).
“We came to win and we won while resting some of our main players, thats our main goals going into this game,” wika ni Smart Gilas coach Rajko Toroman sa kanyang Nationals na nagmula sa isang 70-78 kabiguan sa Koreans.
“Japan is a good team, they have players who never give up and they have great shooters,” dagdag ni Toroman.