CEBU, Philippines - Gipakita sa Cebu Institute of Technology-University (CIT-U) Wildkittens nga mas bangis pa sila sa University of San Jose-Recoletos (USJ-R) Baby Jaguars pinaagi sa pag-iskor og 59-56 nga kadaugan sa bugtong duwa sa secondary division sa 11th Cebu Schools Athletic Foundation Inc. (CESAFI) basketball event kagahapon sa Cebu Coliseum.
Nahimong bayani si Nikko Otadoy pinaagi sa iyang crucial triple sa nahabiling 4.2 segundos sa regulasyon.
Kanunay nga mabiyaan og double figures sa first half, ang Wildkittens nagmangtas sa third period aron makibhangan ang labaw ngadto na lang sa kuwatro puntos, 42-46 paghuman sa maong period.
Si Mark Vincent Laguna, ang kinagamyang player sud sa korte, miposa og triple pagsugod sa final period aron mosikit og maayo, 45-46, ug nasundan sa basket ni Kevin Barkley Eboña aron makalabaw ang Wildkittens sa makaduha ka higayon, ang katapusan sa iskor nga 49-48 sa tunga-tungang bahin sa fourth quarter.
Nagtabla ang duwa, 56-all human sa tira ni Al Jaynee Bayucot sa nahabiling 50 segundos, apan si Otadoy miposa sa iyang marka-bahalang triple sa katapusang 4.2 segundos aron luwason ang Wildkittens.
Si Otadoy maoy nangu sa kadaugan pinaagi sa iyang 17 puntos, samtang ang tandem nilang Roland Augustine Hermosilla ug Buyucot nagkumboya og 23 puntos aron pangulohan ang Baby Jaguars. (BANAT)