Maayong adlaw mga tirador!
Nakatan-aw ako sa TV sa sangka ni AJ Banal ug sa Canadian nga si Tyson Cave diha sa Hoops Dome sa dakbayan sa Lapu-Lapu niadtong miaging semana.
Nakadaog man tuod si Banal, apan alang kanako dili kaayo kini impresibo tungod kay ang ring physician man maoy mipahunong sa duwa ug dili ang kinumo ni Banal.
Sa akong tan-aw kaya kaayo sa kumo ni Banal si Cave. Si Cave moping-it inig kaigo sa iyang kilid.
Ambot kun nagpadala ba sa iyang emosyon si Banal tungod sa kaidlas ni Cave kay sa mga rounds sige naman siya og kasipyat ,daghan nang nausik sa gilabay niyang kumo.
In fairness kang Cave , idlas gyud siya ug dili basta maigo tungod sa iyang double-back pedal nga taktika, unya pakapinan og takilid ug talikod. Mao bitaw nga sigeng maigo ang iyang sampot.
Kun duna may mahinumduman ang mga Sugbuanon kang Cave , kini mao ang iyang pagka-komedyante sa ibabaw sa ring niadtong adlawa.
Kun kini iyang gihimo aron paglingaw sa mga nanan-aw siguro duna gyud nakakatawa ug may maglagot sab. Labaw sa tanan si Banal nga daw wala hatagi og respeto ni Cave sukad pa sa pag-abot niini sa Sugbu, diha sa weigh-in ug hangtod na sa ilang sangka.
Sa challenger nga idlas pero dili kaayo kusog og kinumo (sa akong pagtan-aw kang Cave) labing maayong buhaton mao ang pagpaabot sa atake niini aron mo-counterpunch.
Niining paagiha dunay tsansang mo-connect sa counter imbes nga maggukod-gukod unya lihayan ra imong kumo. Kapuyon ka pa, unya tikdol-tikdolan ka sa jabs.
Kay si Cave maoy challenger, mopugos gyud siya og duol kun gusto niyang ilugon ang bakus. Dili ba?
Sa akong tan-aw pilde si Banal sa taktika ni Cave. Kay gikan sa sinugdanan si Cave maoy nagdiktar sa tempo sa away mao ganing wala kaayo siya makulatahi.
Dili hinuon ko makaingon nga inferior boxer si Banal kumparar kang Cave kay wala man moabot sa 12-round ang away. Basin lahi ang resulta kun naabot pa sa unahan.
* * *
PAGTULON-AN: Kun ikaw nasuko tungod sa kawad-on, imong giusikan kun unsay naa ka.
* * *
PANAWAGAN. Gipanawagan ang mga opisyales sa Alpha Sigma Omega –Sigma Chi Gamma International Collegiate Service Fraternity and Sorority ilabi na diha sa Theta Phi Chapter sa pagkontak sa Grand Sioux Alumni Council (GSAC) officers aron makuha ang inyong mga contact numbers alang sa mga umaabot nga activities karong tuiga. You can e-mail me for answer.
* * *