Sukmagay sa Mandaue

CEBU, Philippines - Tubagon na karon ni super bantamweight prospect Dodie Boy Peñalosa Jr. ang daku niyang hagit sa iyang pakigsangka ni Kong Kiatpracha sa main event sa "Laban ng Lahi: Dugong Kampeyon" karong gabii didto sa Mandaue City Cultural and Sports Complex.

Ang anak ni two-division world champion ug pag-umangkon ni Pinoy boxing icon Gerry Peñalosa maninguha nga modaog tungod kay nagdepende sa maong away ang iyang kahigayonan nga malakip sa undercard sa gipaabot nga Manny Pacquiao-Juan Manuel Marquez fight sa Nobiyembre 12 didto sa Las Vegas.

Bisan pa'g wala siya'y bisan gamay nga ideya sa estilo sa iyang kontra, ang 21-anyos nga si Peñalosa kompiyansa nga makakita og paagi aron idispatsar ang labing una niyang langyaw nga kaatbang.

 "Honestly, zero (idea) gyud ko aning akong kontra (Kiatpracha). Wa ko kita og tapes sa mga away niya maong wa ko'y idea unsaon akong strategy," matud pa ni Dodie Boy Jr. atol sa official weigh-in kagahapon didto sa Sports Exchange Bar and Grill.

Ang duha parehong mitimbang og 122 lbs. 

"Pero kompiyansa ko nga modaog and wa gyud ko'y kulba nga na–feel ug kun makakita ko og chance bisa'g sa round ako ni siyang tumbahon."

Sa iyang bahin, ang Thai trainer nga si Win Panyaparichot mibahad nga dili basta-basta ang iyang boksidor tungod sa kataas na sa kasinatian niini, dili lang sa boksing, apan lakip na usab sa Muay Thai.

"Yes he is good (Dodie Boy Jr.) but my fighter has experience and that’s what matters most," matud pa ni Panyaparichot.

Sa supporting bout, ang kanhi WBC light flyweight title-holder nga si Rodel 'Batang Mandaue' Mayol makigsangka ni Jason Rotoni sa Manila, samtang si former two-time OPBF king Jimrex Jaca makigsinukliay og kumo ni Philip Jun Demicillo.

Mobanat usab sa iyang comeback fight si Eden Sonsona batok ni Eman Labanza, samtang sila si Randy Petalcurin ug Michael Rodriguez magsangka alang sa PABA light flyweight title. (BANATSPORTS)