Belano nangu kadaugan sa Theam Cargo

CEBU, Philippines - Gipakita ni ex-pro Felix Belano ang iyang mga tirada nga maoy mitukmod kaniya ngadto sa PBA human siya miposa og 25 puntos, lakip ang upat ka triples aron pangulohan ang Theam Cargo Forwarding Services ngadto sa usa ka impresibong 109-95 nga kadaugan batok sa Akira ug aron usab sakmiton ang solong liderato sa   St. Augustine Fiesta Cup 2011 basketball tournament didto sa Inayawan Sports Complex.

Ang Theam Cargo sa beteranong coach nga si Danny Duran, nabiyaan sa sayong bahin sa first period, 7-15, apan sa wala damha milusad og 14-0 run aron ilogon ang labaw, 21-15 sa nanghinapos nga bahin sa maong kuwarter.

Dali sab hinuon nailog sa Akira ang labaw ug gani miabot pa ngadto sa 14 puntos, 40-26 sa nahabiling 6:15 sa second period.

Mi-rally pag-usab ang Theam Cargo sa pagpangulo ni Hamer Daclan aron ilogon og balik ang momentum, 43-40 sa halftime. Sukad niadto, ang Theam Cargo ni team manager Emier Hamis ug team owner Olive Paraguas mao na ang kanunay naglabaw hangtod nahurot ang oras sa duwa.

Si Danny delos Santos miamot og 18 puntos, samtang si Michael Sumayang miabuno og 17 puntos Sila si Wowie Escocio ug Hamer Daclan nagkumboya og 31 puntos sa maong kadaugan. 

Si Guangco maoy nangu sa Akira pinaagi sa iyang  27 puntos. 

Sa laing duwa, ang SLP naka-eskapo gikan sa mga kamot sa Davies Salon sa iskor nga 97-94, samtang ang Nards nidaog sab   batok sa Sunrise, 79-68.

Puntos Matag Usa

Theam Cargo (109) - F. Belano 25, Delos Santos 18, Sumayang 17, Escocio 16, Daclan 15, Lopez 11, Alano 4, J. Belano 3

Akira (95) - Guangco 27, Capangpangan 17, Cabo 12, Baguio 9, Caputolan 8, Hoybias 8, Torion 5, Bacalso 5, Abasolo 2, Cabrera 2.  - BANAT NEWS