Duguon Nga Kadaugan

CEBU, Philippines - Bisan pa sa grabeng pag-agas sa dugo gikan sa gisi sa iyang kilay ug hugaw nga duwa nga gipakita sa Canadian nga si Tyson Cave, milampos gihapon si ALA Boxing Gym stalwart AJ “Bazooka” Banal sa pagdepensa sa iyang WBO Asia Pacific bantamweight belt pinaagi sa 8th round technical decision niadtong miaging gabii sa Hoops Dome sa Lapu-Lapu City.

Miuwan og mga “boo” gikan sa mga boxing fans nga nakasaksi sa bati nga inawayan ni Cave kinsa nagmakuli pakig-bell-to-bell ni Banal og nagpunay nalang ug dagan.

Inay makigsinumbagay, gigamit na hinuon ni Cave ang iyang hugaw nga duwa pinaagi sa paglamba ug pagsungay sa ALA fighter.

Usa usab ka low blow ang gibuhat sa Canadian ngadto ni Banal sa tunga-tungang bahin sa away nga mipasamot sa kalagot sa mga boxing fans , apan wala maluya si Banal ug padayun kini sa iyang atake ngadto sa ulo ug lawas sa 29-anyos nga si Cave.

Atol sa fifth round usa ka accidental headbutt ang miabli og dakung gisi sa tuong kilay ni Banal nga gipahimuslan ni Cave pinaagi sa pagpasulod sa iyang mga jab.

Nagpadayun ang ginukdanay ni Banal ug Cave ibabaw sa ring, apan napugos si ring physician Jose Unabia nga hunungon ang away sa 2:32 sa eight round human misamot kakusug ang pag-gawas sa dugo gikan sa samad ni Banal.

Si Banal maoy naglabaw sa tulo ka scorecards– 79-73, 78-74 ug 78-74 nga maoy mihatag kaniya sa kadaugan.

Human sa away, gamay nga kasikas ang mitumaw dihang wa kapugong ang mga naglungot-lungot nga mga fans sa pagsyagit ngadto ni Cave ibabaw sa ring, samtang usa sa mga trainer ni Cave ang milabay sa gloves ngadto sa audience. Tungod niini gi-escort sa security ang Team Cave padulong sa ilang dressing room.

“Sige lang siya (Cave) og dagan. Ako lisud nako pagkita sa akong mata ako lang giantos pero di man musukol og sinumbagay,” matud pa ni Banal.

“Expect ko sa iyang style nga kanang lihay ug magdagan-dagan pero nakalitan mi sa kagrabe kahugaw niya moduwa, naa tanan wrestling, low blow nya tukmod,” dugang pa sa iyang trainer nga si Edmund Villamor.

Sa iyang bahin, giisip hinuon ni ALA president Michael Aldeguer nga nindot nga butang alang ni Banal ang kasinatian sa pakigsangka ni Cave. “The good thing here is that you can see the maturity was there for AJ and if only the fight continued he could have win convincingly,” matud pa niya.

Gipahibalo usab ni Aldeguer nga segurado na ang rematch ni Banal batok ni Panamanian Rafael Concepcion sa Enero sunod tuig.

Sa supporting bout, si Michael “Bruce Lee” Domingo mikastigo ni Indonesian champion Richard “King Cobra” Samosir kinsa misurender sa sixth round, samtang ang knockout artist nga si Lorenzo “Thundervolt” Villanueva mi-KO sa first round ni Eddy Camaro.

Milampos usab ang Boholano nga si Romeo “Jaku” Jakosalem sa pagsakmit sa Philippine light welterweight pinaagi sa pagdemolis ni Eusebio Baluarte sa 2:53 sa opening round.  - BANAT NEWS