Sumakmagay sa Hoops Dome

CEBU, Philippines -Makita na ang katag sa duha ka boksidor nga sila si AJ 'Bazooka' Banal ug Canadian sensation Tyson Cave sa dihang magsangka kini sa main event sa "Pinoy Pride 7: Battle at Mactan" karong gabii didto sa Hoops Dome sa Lapu-Lapu City.

 Sa gihapon, si Cave mibuhi na sab og mga hait nga pulong ngadto ni Banal atol sa official weigh-in kagahapon didto sa Gaisano Grand Mall sa Mactan.

Sila si Banal (24-1-1, 19KOs) ug Cave (15-1, 5KOs) parehong mitimbang og 117 ¾ lbs.

Ang 29-anyos nga si Cave nagtuo nga mas labaw siya ni Banal kun conditioning ug kusog ang hisgutan.

"I love all the Filipino people, but I came here to win against him (Banal) and after that everybody will love me and from there I’m going to be known as Filipino Tyson Cave," matud pa ni Cave.

Ang iyang conditioning coach nga si Karim Collette kompiyansa nga modaog ang iyang boksidor tungod kay aduna kini abilidad nga mas molahutay hangtod sa katapusang round.

"You can see his (Cave) ready, I can see this fight will go till the twelve round with Tyson winning by unanimous decision against Banal," sumala pang Collette.

Apan ang kalmadong si Banal wala mahulga ug matud pa niya nga siya na usab ang mo-show karong gabhiona ug iyang ipakita kun unsaon niya pagpilde si Cave.

"Kabaw ko lihay siya pero ako gyung paningkamotan nga madakpan ug didto ako siyang suwayan pagkuha (knockout)," matud ni Banal, kinsa manalipod sa iyang WBO Asia-Pacific bantamweight title sa ikaduhang higayon.

"Pero kun moingon siya nga taas nga away, andam usab ko ug kondisyon ko bisan og 13 o 15 rounds pa," dugang pa niya.

Gitug-an ni Banal nga mahinungdanon ang maong away alang kaniya tungod kay mao kini ang barometro alang sa katumanan sa iyang damgo nga ikasangka pag-usab si Panamanian Rafael 'El Torito' Concepcion.

Sa supporting main event, pamatud-an usab ni Michael Domingo (40-15-5, 18KOs) nga anaa pa niya ang abilidad nga mahimong world title contender sa dihang sangkaon si Richard Samosir (18-3-3, 7KOs) sa Indonesia.

Mopakita usab og aksiyon sa undercard ang Mindanao knockout artist nga si Lorenzo Villanueva (20-0-0, 19KOs) sa North Cotabato batok ni Eddy Camaro (24-10-4, 9KOs) sa Indonesia.   (BANATSPORTS)