Banal gihudlat ni Cave

CEBU, Philippines May usa pa gani ka adlaw sa dili pa ang ilang sangka, apan misaka na ang tensiyon nila ni ALA Gym fighter AJ 'Bazooka' Banal ug Canadian sensation Tyson 'Prince of Hali' Cave nga nagpasingitay sa una nilang panagkita.

Sa gipaabot, si Banal (24-1, 19KOs) gihudlat na sab ni Canadian fighter Cave (15-1, 5KOs) atol sa final press conference sa Pinoy Pride 7: Battle at Mactan" kagahapon didto sa Plantation Bay Resort and Spa sa dakbayan sa Lapu-Lapu.

Si Banal manalipod sa iyang WBO Asia Pacific bantamweight title sa main event sa Pinoy Pride 7 ugma sa gabii didto sa Hoops Dome sa naasoy'ng dakbayan.

Si Cave nga dugay nang nangita ni Banal sukad sa iyang pag-abot dinhi sa nasud niadtong Domingo, mipasiaw na sab ug mihagit ni Banal, kinsa gibaharan niya nga iyang pakauwawan atubangan sa liboan ka mga Cebuano boxing fans.

Ang 29-anyos nga si Cave mitug-an nga wala siya mahadlok sa knockout power punches ni   Banal sa ALA Gym tungod kay dili kini makaigo kaniya.

"I’ll give him (Banal) five dollars every time he touches me," hambog ni Cave.

Apan ang garbo sa Brgy. Ermita nga si Banal igo lang mipahiyom ug kalma nga mitubag sa mga tirada ni Cave.

"Aw makita ra man unya na sa ring ba asa na kutob iyang pagarpar. Bisan unsa pa siya kaabtik nga iyang gipanghambog, madakpan ra gihapon na nako siya," matud pa ni Banal kinsa nangandoy og "rematch"    batok ni Panamanian boxer Rafael Concepcion.

Sa supporting bout, si former world-title challenger Michael Domingo (40-15-2, 18KOs) makigsinukliay og kumo ni Indonesian Richard Samosir (18-3-3, 7KOs), samtang ang knockout artist nga si Lorenzo Villanueva (20-0, 19KOs) mosuway pagtumba ni Indon warrior Eddy Camaro (24-10, 9KOs). 

Ang official weigh-in sa Pinoy Pride 7 himuon karong alas-11 sa buntag didto sa Gaisano Grand Mall sa Mactan. (BANATSPORTS)